Huchi’n mikhualte tengteng a kipan in amaute ka sawpsiang a, siampute a ding leh Levi mite a ding in, mi chih a nnasep uah, nnasep dante ka sehsak a; Huan a hunte sehsa a sing thillat ading, leh gah masa a ding in, Aw ka Pathian, hoihna di’n kei hon thei gige in (Neh.13:30,31).
Tuni a i tangteel tuh Nehemiah laibu tawpna ahi. Tawpna hoih lua a bang kei a, himahleh Nehemiah a ding in bel a tawpna ding dan mah in a tawp hi. A nasep ding a zou a, Jerusalem kulh baang taksa (physical wall) leh khalam ah (spiritual wall) a tungding nawn hi. Pathian deih dan a sem zou a, kipahman a mu thei hi.
Nehemiah in a nasepna ah Pathian deihdan ahih ding poimoh ngaihpen in a nei hi. Mi kipahpihna a tan louh hun, mi a taihilh hun, a heh hun leh a kiselpih hun leng a om hi (13:25).
Nehemiah bang in Pathian’ lalgam nasepna ah haksatna i tuah hun, lungkiat hun, mi kipahpihna i tanlouh hun, mohsakna i tan hun chihte om tham ding hi. Tuni a i tangteel ngaihtuah zelzel a, “Aw ka Pathian, hoihna di’n kei hon thei gige in” chi a, i nasepte Pathian deihdan ahih ding ngaih poimoh pen a nei ding in i kihanthawn hi. I nasepte Pathian’ deihdan ahihnak leh a dang poimoh omlou hi. I kipahman leitung amuh ding hilou in vangam ahi chih thei ni.
Unaute zingpha. Tuni hun zatnuam chiat