Huchih lai in a unaute uh Judate dem a nakpitak a kikouna mite leh a zite uh a kipan in a hong omta hi (Neh.5:1).
Pathianmi makai diktak (godly leader) ten a mipite uh sung a buaina omte a phawkbaih ua a khawksak (sensitive) uh a poimoh hi.
Bung 4 ah Nehemiah in polam akipan buaina omte a buaipih a, himahleh bung 5 ah amau sunglam akipan mahmah buainate hon sai a ngai hi. Makaite a ding in polam akipan buainate sang in sunglam akipan buainate omte a haksa zaw hi.
Nehemiah in hiai bang sunglam akipan buaina omte a maituah dan akipan i zil theih om ding hi.
- A heh mahmah hi (5:6): Hehna toh kisai ah i pilvanna ding bel a om a (Pau.14:29; 15:18; 16:32; etc.), himahleh i hehna ding mun leh hun a om tham hi (Mk.3:5). Makai ihihna ah awlmoh luat ziak a i heh khak leh thilsia ahi pah kei hi.
- Pilvang tak in a sem hi (5:7): Hehna a poimoh hun om mahleh, hehna ziak a manmoh tak a thilhih hehu lou dia kithunun siam a poimoh hi (Pau.14:29; 18:17).
- Deihsak tuam neilou in a om hi (5:7): Nehemiah hehna tuh miliante leh vaihawm mite (nobles and the officials) tung ahi. Kulh baang a lam zoh na ding in amaute panpihna poimoh (bung 3) mahleh khawk a sa kei hi. Thildik hih tuh a poimoh ngaihzaw hi. Makai hoih i hih theihna ding in mi thunei leh thupite panpihna poimoh mahle hang deihsak tuam neitak a nasep louh a poimoh hi (Deut.16:19).
- Aman a hinkhua ah a lak hi (5:10): Nehemiah mahmah in mi gentheite hehpihna langsak masa ahihman in mi hausa dangte leng amah bang a mi gentheite hehpihna nei ding in a hilh thei hi. Huaiziak in makai ihihna ah i mipite zuih theih ding in en i hinkhua a i laksat a poimoh hi (cf.Matt.23:2,3).
Nehemiah bang in sunglam a buaina omte khawksak in, amah apan ziltheihte zil ni.
Unaute zingpha. Tuni hun zatnuam chiat