Huan David in Pathian kiang ah, Hiai thil ka na hihna ah nakpitak in ka na hihkhialta ahi; himahleh na sikha thulimlouhna hehpihtak in ngaidam in, haihuai tak in ka na hihta ahi, a chi hi (1 Kro.21:8).
Hiai bang a Pathian kiang a na thum nanung pen bang chik ahita a?
Theina zenpi in David in a hon hih khial teitei hi. A thilhih dek a haihuai dan a sepaih heutu Joab in vauhilh mah leh a hihkhial teitei hi. A thuneihna kisuanpih in, a kimuanluatna ziak in Pathian kalh in thil hon hihkhial kha hi.
Haihuai tak a thilhih hina ngut e!
David bang a haihuai tak a thil na hihkhak chiang in bang na hih dia?
- Na hihkhelhna pom in: Suanlam bawl in kisiamtan sawm kenla, Pathian mai ah David bang in na hihkhelh pom in, a moh kipuak zaw in.
- Apaap (consequences) pomsiam kisin in: Pathian in hon ngaihdam ziak in a paap a om het kei ding chihna hipah lou hi. Khelhna kiphawkna leh kisikna diktak in hihkhelhna ziak a thuakna omte kingainiam tak a pomsiamna hon tun zaw hi.
- Maban suan dan kisin in: Hun paisa thilte a khosak nilouh phattuamna omlou hi. Pathian in hon ngaihdam leh ngaihdam ahi mai hi. Na thiltuah pen maban a hoihzaw a hinkhua na zat theihna dia sinlai hoihtak in pangsak zaw in.
Pa aw, ka kisaktheihna uleh ka kimuangluat ziak ua haihuai tak a thil kana hihkhak zelte uleh na deih dan lou a kana om khaknate uh hon ngaidam in.
Unaute zingpha. Tuni hun zatnuam chiat