Huan, Ahazia nu Athalia in a tapa a si chih a na theih in, a thou a kumpipa tate tengteng a that vek a. Ahazia tapa Joas bel kumpipa Jehoram tanu, Ahazia sanggamnu Jehosaba in kumpipa tapa a thahte uh lak a kipan a pimang a, a donmi toh lupna dantan ah a omsak a; Athalia muh theihlouh ding in a sel ua, huchi’n thah ahita kei (2 Kum.11:1,2).
Tuni a i tangteel hunlai tak tuh Israel a kithahtuahna a om vingveng hun laitak ahi. Jehu in Jezebel, Joram (Israel kumpi), Ahaziah (Juda kumpi) leh Ahab inkuanpih teng (Baal siampute le tel in) a that khin vek hi.
I tangteel a i muh bang in Jezebel’ tanu, Athaliah in a tapa Ahaziah si ahi chih a theih phet in kumpi gouluah thei ding kumpipa’ tate tengteng that vek a, himahleh a tapa Joash tuh Ahaziah’ sanggamnu, ani Jehosaba in ana sel in a humbit kha hi.
Jehosaba in a thilhih kumpinu Athaliah in thei leh that ding ahi chih thei tham ding hi. Himahleh Joash humbit thouthou a, huaiziak in David’ suan a kumpi khanggui tuh humbit in a om kha hi.
Mohna neilou mite tung a diklou tak a tualthahna leh vaihawmna a om hun ah Jehosaba bang i om ngamna diam? Ahihkeileh kitheihmohbawl a dai maimah in i om diam chihte mimal chiat ah kingaihtuah ding in hoih hi.
Etdan tuam in en lehang, David khanggui akipan laltutphah luahthei om sun Joash hong suak hi. Huaiziak in Jehosheba in Joash ana hutkhiakna ah, Jesu tuh David suan akipan hong piang ding chih ahihziak in Jesu leng honkhe kha a suak hi.
Unaute zingpha. Tuni hun zatnuam chiat.