Huan, Pathian’ mi sikha zingkhang in a thou a, a va pawtkhiak leh, ngai in, sepaihte’n sakol toh kangtalai toh khua ana um suakta ua. Huan, a sikha in a kiang ah, Ehe heh, pu! bang chi a hih ding i hia? a chi a. Huan, ama’n, Lau dah in; amau lam a pang sa’ng in ei lam a pang a tam zaw hi, a chi hi (2 Kum.6:15-16).
Tuni a i tangteel a tangthu tuh i simsuak leh ngaihnop huai mahmah hi. Elisha in a sikha a ding in thumna a neihsak zoh in Toupa’n a mit a vaksak a, huchiin Elisa vengbit ding in a kimvel a mualte mei kangtalai (chariots of fire) leh sakol a dimvek hon mu samta hi (6:17).
Hiai tangthu in nang leh kei a ding in bang hon musak a?
- Mi tam lam a kheng a om ngeilou ihi (We’re never outnumbered): Pathian thutak zui tawm lua kisa a, thawmhau a i om hun om sek hi. Himahleh Pathian thutak a i din nak leh Pathian eilam ah pang gige ahi.
- I mitte khemtheih hi. Khalam thilte neuchik a mu a, khovel thilte lianpi a hon musak thei ding in Setan zei mahmah hi. Ei hon dou taksa kangtalai leh sakolte lel hon musak sek hi. Himahleh ei hon panpih ding khalam kangtalai leh sakolte toh teh in amau bangmah hilou uhi.
- I lauhthawng louh ding uh ahi. Setan i kihihlau sak ngeilouh ding ahi. Amah sang in ei hon panpihtu ding Pathian lauhuai zaw a, kumpite Kumpi, toupate Toupa ahi hi. Huaiziak a bang lau ding ihia?
Pa aw, na muanhuaina mu thei ding in ka mit uh hon hihvak sak in.
Unaute zingpha. Tuni hun zatnuam chiat