Huan, Hichi ahi a, Ahab in Elija a va muh in Ahab in a kiang ah, nang na hi maw, Israelte buaisakpa? a chi a. Huan, ama’n a dawng a, Israelte ka buaisak kei hi; nang leh na pa innkote eive buaisak zaw, Toupa thupiakte lehngat san a, Baal na pom zawk na ah (1 Kum.18:17-18)
Buaina tuntu a ngoh in na om kha ngei hia?
Nungzui diktak ten hun paisate leh tutan in leng buaina tuntu ana hihna hun uh om tham a, midangte a hehsak mahmah hun uleng om sek hi.
Buaina om sak ngeiloute a vauhilhna (warning) ah Jesu’n hichiin ana gen hi: “Mi tengteng in ahon phat chiang un na tung uh a gik ding hi; huchimah bang in a pipute un zawlnei takloute tung ah a hih uhi” (Lk.6:26). Zawlnei taklou ten mi ngaihnuam lamlam gen uh ahihman un mi tengteng in a phat uh.
Himahleh zawlnei tak ten bel thutak, Pathian thu toh kituak gen ua, huai thutak deihlou ten mudah in hua ua, buaina omsaktu a suah hun uh om hi. Huaiziak in Laisiangthou a Pathian zawlnei ten sawina ana tuah sek uhi (Matt.5:11-12).
Buaina tuntu teng Pathian in kipahpih i chihna bel hi hetlou hi. Peter in hiai bang in gen hi: “Himahleh, na lak uah kuamah in tualthah ziak hiam, a guktak ziak hiam, a kikumlouhna thilhoihlou ahihziak hiam in thuak kei hen” (1 Pet.4:15). Khen chiang in Pathian thutak ziak leng hi khollou, eimah khelhna ziak khawng a buaina tungsak a i thuak hun om thei hi. Hiaite ah Pathian kipak lou hi.
Laisiangthou thutak i gen ziak a buaina i piansak a, i thuak leh asia ahi kei a, Pathian kipahlam ahi zaw hi. Himahleh thutak i genna ah itna toh i gen ngai a (Eph.4:15), ei a om ginna pen thunuailut leh zahtakdan siam kawm a i gup ngai hi (1 Pet.3:15).
Khristiante tuh thutak gum a i ding diing mah ahi. Huaiziak a buaina i tut a, i thuak leh hampha ihi chih thei ni. Hiai bang hamphatna i tankhak leh kipak in nakpitak in nuam ni; van ah i kipahman ding om hi. Hiai bang in zawlnei ginom ten ana thuakta uhi (Matt.5:12).
Pa aw, na thutak gum a thuakna di mun ah leng thuak ngam ding in hangsanna hon pia inla, koi dounate douna hoih ahia chih theithei ding in pilna hon pia in.
Unaute zingpha. Tuni hun zatnuam chiat