Munsagte ahihleh a thelthang sak kei a; himahleh Asa lungtang a damsung teng in Toupa lam ah a hoih bukim hi (1 Kum.15:14)
Asa tuh Juda-te kumpi hoih mahmah khat ahi. David bang in Toupa mitmuh in thilhoih a hih zel hi (15:11). A lalgam sung a pasal kizuakte a delhkhia, a pu te’n milim a na bawlte tengteng uh a thelthang sak vek hi (15:12). A nu Maaka leng, milim kihhuai mahmah Asehr a bawlsak ziak in, a kumpinu hih a tawpsak hi (15:13). Toupa inn (temple) a thillat dia thilpiak kipete hon tungding kik nawn hi (15:15).
Asa thilhoih hih tampi kigen mahleh tuni a i tangteel ah ahih louh khat gen lat in hong om a, huai tuh munsangte a hihsiat louh ahi.
Hiai munsangte toh kisai 1 Kumpipate 11 ah genkhak in om a, huai ah Solomon in a zi ten milim pathian a biakna ding uh maitam a bawlsak chih i mu hi.
Asa in milim biakna munteng ah suse vek chih i muh ziak in hiai munsangte ah leng milim biak a phal kei ding chih gintakhuai hi. Hiai munte Pathian hing biakna ding in zang leng ahi kha maithei uh, himahleh Pathian in a min omna, Jerusalem a biakna neih ding thupiak ana pia hi (Deut.12; 1 Kum.9:3).
Huaiziak in hiai munsangte a hihsiatlouh in milim biakna hong om kik nawnna ding hun lem a pe khakha hi. Milim biakna mun a om nilouh pen in milim biakna thil ten honna thuzoh (influence) khak theihna ding lampi a om sak gige hi.
Asa in tundingna nna hon sep pen a bukim zoulou deuh a om hi. Nang hinkhua la bang a chi a? Na lungtang a milim tengteng na lakhe na hia? Na hinkhua a Pathian a masapen a koih dia na kisak lai in, na lungsim ah munsangte ana om kha lai zenzen hia? Na lungtang apan bang koih khiak ngai di om in na thei a? Hiai dotnate mimal chiat ah kidong le’ng ichi hi.
Unaute zingpha. Tuni hun zatnuam chiat