Huan, Nakon a phual tan a tun un Uza in Pathian bawm a sawk a, a len a; bawng a hoihoi ziak in. Huan, Uza tung ah TOUPA a hong heh guih a, a thilhih diklouh ziak in Pathian in huai lai ah a hihlum a, Pathian bawm kiang ah a sita (2 Sam.6:6,7)
Baale-judah (Kiriath-Jearim toh min kibang – Jos.6:9,60) a Pathian bawm kum sawm nih val phial a om nung in David khopi a koih sawm in David makaihna in hon pawkhia uhi (1 Sam.7:2; 2 Sam.6:10; 1 Kro.13:13). Huchiin Abinadab’ inn akipan lakhia in a tapa Uza leh Ahio ten kangtalai thak a bawl uah hon pua uhi. Tuni a i tangteel a imuh bang in Nakon buhchilna phual hong tun un bawngtalte hong kipal khak ziak in Uza in Pathian bawm len ding in a khut in a sawk a, a sihloh hithet hi.
A khut a bawm a va sawk kia hilou in, hiai Pathian bawm hon puak dan himhim uah leng Pathian thupiak kalh kha uhi. Pathian thupiak dungzui in Pathian bawm tuh Levi Siampu Kohath tate’n chiang a azawn thoh ding uh (Exo.25:12-15; 37:1-5; Nam.7:9), ngalvangvun (goatskin) a atuam ding uh (Nam.4), Levi ten leng a sihlouhna ding ua a khoih khaklouh ding uh (Nam.4:15) chih ahi. Hiai thupiakte nelhsiah in kangtalai ah hon pua in Uza in a va khoih kha zomah hi. Uza in a sihloh ziak in David in leng a hihkhelh thei in, Pathian thupiak bang in Levi-te hon zawngsak hi (1 Kro.15:2, 12-15).
Bang chituk in i lungsim leh thiltup dik mah leh Pathian thupiak bang a i hih keileh Pathian a ding in pomtak hilou hi. It siam, hehpih siam Pathian himahleh a thupiak zuilou a mahni hoihsakna bang a thilhih in Pathian thangpaihna tun zaw hi. A thupiak bang a Pathian bia a, a nna sem a, i hinkhua zang chiat ding in panla thak ni.
Unaute zingpha. Tuni hun zatnuam chiat