Huchi’n Mano in TOUPA kiang ah nget chihtak in a ngen a, a kiang ah, Aw TOUPA, hehpihtak in huai Pathian mi na hon sawl ka kiang uah hong nawn leh, naupang hong piang ding bang ka chih ding ua hong sinsak hen, a chi hi (Vai.13:8)
Tuni a i tangteel tuh Samson pianna ding toh kisai angel in anu kiang a ahilh zoh nung a, apa’n Pathian kiang a Samson pian ding gentu angel hohsak nawn dia a ngetna ahi. Laisiangthou ah Samson nu leh pa khalam dinmun i theih chet semna ding in bangmah muh beh ding a om sau het kei a, himahleh hiai i tangteel akipan in a tapa piang ding tuh Pathian lau a hong khangletna ding a hoihtak a sinsak nuam a bang uhi.
Pathian lau inkuan hoihtak akipan leng tate hong khanglet chiang un Pathian phawklou chih om thei tham hi. Samson leng ginna a mi minthangte lak ah gentel khak in om mahleh (Heb.11:32) Laisiangthou a ahindan i muh tan in a hoih lam gen ding tam khollou abang hi. Numei thei, mahni thudeih leh hehbaih mi a bang hi.
Tate hong khanlet a Pathian hon phawklouh chiang un nu leh pa ten mahni kimohsakna in hun kizang khasek hi. A hoih bukim i om kei a, bawlkhelh (mistakes) neilou leng ki-omlou hi. Ta ten Pathian hon theihna ding un thuzoh theihna bang tan hiam kinei mahleh, ataktak ah Pathian thu pen mimal thupukna liauliau ahihman in a hong let nung un bel amau thupukna hi zawta hi.
Pa aw, ka tate uh na deihna bang a ka thuzoh louh ziak ua ka lunggimnate uah nang hon khamuan in.
Unaute zingpha. Tuni hun zatnuam chiat