TOUPA na Pathian un kei bang na unaute uh laka mi zawlnei a hon bawlsak ding hi: a thu na ngaikhe ding uhi; TOUPA i Pathian aw zaw hon za sak nawn k’en la, hiai mei thupi honmu sak nawn k’en la, ka si kha ding hi, chi a Horeb tang a kikhop khawm ni a TOUPA na Pathian uh na deihdan bang un (Deut.18:15,16).
Mosi leh Jesu’n kibatna tamtak a nei ua, Jesu Khrist nasep ding tamtak Mosi’n honna galmuh sak hi. Mosi hihna khenkhat en le hang:
- Dan petu ahi. Sinai tang a paitou in Pathian kiang apan vala in Israel-te a pesawn hi.
- Tankhetu ahi. Israel-te Aigupta saltangna ua kipan a tankhetu hi.
- A mite khelhna pawtu ahi. Jesu dan hial khelhna pawtu hi kei mahleh Israel ten bawngnou lim a biak ua, Pathian in a sukmang dek lai in, mipite sukmang sang in amah min a laibu apan lamang zaw ding in Pathian a ngen hi (Ex.32:32)
- Belampu ahi. Gamdai ah a mite kum 40 hial api hi.
- Palai ahi. Israel mipite leh Pathian kikal a palai ahi.
A hun in Mosi ana thupi mahleh Jesu kong bangkim ah a thupi zaw hi. “…Mosi tuh Pathian innkuante tengteng lak a nnasempa in zaw a muanhuai ngei hi;…himahleh Khrist bel Pathian innkuante tung a Tapa in a muanhuai ahi..” (Heb.3:5,6). Pathian toh kinai tak a khosa, Pathian’ mel mu a gen a om hial himahleh amah hon ngetsak theih val in Khrist in Pa kiang ah hon ngetsak theih hi. Palai a Khrist i neih hamphat huai hina maizen e maw!
Unaute zingpha. Tuni hun zatnuam chiat