Huan, hiai thu, tunia ka hon piak na lungtang uah a tam gige ding a; Na tate uh phatuamngai tak in na sinsak ding ua, na inn ua na tut lai bang un, lampi a na pai lai bang un, na luplai bang un, na thoh chiang bang un na gen zel ding uhi (Deut.6:6-7)
Nu peh pate a ding in tate thuhilhna sang a i hihtheih poimoh zaw dang omlou hi. Mosi in, “TOUPA na Pathian kia TOUPA ahi” chih gen masa a, huchiin “TOUPA na Pathian uh na lungtang tengteng un, na lungsim tengteng un, na hatna tengteng un na it ding uh ahi” chih gen behlap hi (Deut.6:4,6). Hiaite i lungsim a nei a, hiaite mah tuh tate kiang a hilh sawn ding ahi chi hi. Hiai thupiak tate i hilh sawn theihna ding in thil poimoh nih om hi.
Khatna ah, hun zatkhawm poimoh hi. I tut kawm a i hilh theihna ding in amau toh tut khawm ngai a, lampai kawm a i hilh theihna ding in amau toh lampi paikhawm ngai hi. Hiai in i tate toh hun manpha (quality time) zatkhawm tam poimoh ahihdan hon hilh hi.
Nihna ah, “phatuamngai tak in na sinsak ding uh” chi ahihman in i sinsak theihna ding in kihoutuahna (communication) poimoh hi. Insung khat a tutkhawm, paikhawm kia hunlou hi. Kihou naran hilou in, lungsim tawng apan ngaihtuahna omte tanpha kihilhtuah thei ding a kihoutheihna poimoh hi. Hiai bang a i kihoutheih chiang in amau leng a hinkhua ua thil omte hon hilh thei ua, huai kia hilou in amau mahmah un leng nuam sa uhi. Hiai bang a kinaihna i neih theih chiang in amau poimoh bang sinsakna taktak kipethei hi.
Hiai bang a tate sinsak thei, nu leh pa lohching hi thei chiat ding in Pathian in hon vualzawl hen.
Unaute zingpha. Tuni hun zatnuam chiat