Huan, Toupa’n Mosi a houpih a, Israel suante thu pia inla, a kiang uah, Ka ann kei a dia gimlim mei a thillat, ka kiang ah thillat pen a hun geih zel chiah na lan ding uhi, chi’n (Nam.28:1-2).
Nambar laibu i ngaihtuah khak chiang in a masapen ah Egypt hon nutsiat ua kisimpina (Nam.1) leh anung kum 40 zoh a Kanaan gam hon lak ma deuh ua kisimpinate (Nam.26) i lungsim ah om pah hi.
Himahleh bung 28-29 kikal a i muh niteng, kalteng, khateng leh a hunbi nei a thillat tuamtuam thupiak kigente Nambai laibu a om ding in i ngaihtuahna ah om ngei hetlou hi.
Kanaan lut dia kisa, galdou dia kigingkhol lel ahihna uah galdou thei ding mite kisimpina neih tuh thil poimoh ahi law tham hi. Kisimpina nihte gel ah kum 20 tunglam teng galdou thei ding pasalte hon sim tuaktuak uhi.
Hiai bang hun ah bung 28-29 thu ten hiai Kanaan gam dou dia a kisakkholhna uah bang phattuamna nei ahi de aw chih theih ding bang hi.
Himahleh Joshua laibu a i muh bang in Israel ten kidouna ngeina bang in galdou lou uhi. A galdou masakna pen uh Jericho kulhbaang kimvel a pai a, a khopi zoh a lak ahi hi. Pathian in a gal uh doupih a; a vualzohna utuh Pathian ziak liauliau ahi hi.
Huaiziak in bung 1 leh 26 a galdou dia a kisakkholhna ua akisim bang un bung 28 leh 29-na thute leng galdou dia a kisakkholhna dan un sim theih hi. Hiai thillat tuamtuam ten mipite galdou ding in sinsak hi. Hiai tuh amau lam a Pathian pang a, agal uh a doupihna dia a chialna dan uh ahi chih theih hi. Pathian’ thupiak bang a thillatte a lat chiang un a tung uah Pathian kipak in, a gal uh a doupih zel hi.
Pa aw, na laltutphah siangthou mai ah ah phatna thillatte hon bawl in; tuni a ka galdou uah hong tel ding in kon chial uhi. <span;>Ka ma ua melma omte hon hihlupsak a, na deihna bang a kipumpiak thei ding in hon panpih in!
Unaute Toupa’ ni nitakpha. Mangpha leh ihmut lim chiat