Aigupta gam a kipan a hong pawt uh kum nih kum, kha nihna, ni khat ni in Sinai gamdai ah kihoupihna puan inn ah Toupa’n Mosi a houpih a, Israel suante a om khawm tengteng, a chi chi’n, a ninkuankuan in, a min uh kizomdan bang zel in pasal tengteng sim vek in (Nam.1:1,2)
Nambers laibu in Kanaan gam lutna ding a kum sawmli zen a lutna ziak hon hilh hi. Pathian in Abraham kiang a nam thupitak in kon bawl ding achih Exodus laibu ah sukbuching ahihdan imu a, himahleh a gam chiam, Kanaan pen Israel ten Pathian thuchiam a gintak zohlouh ziak un Nambers laibu tan ah sukbuching hi zoulou hi.
Himahleh Pathiam a thuchiam ah a zuau kei a, Israel-te ginom zou kei mahle uh a gamchiam ah a pilut thouthou hi. Khang masa, Aigupta gam akipan pikhiak a omte khang bel a thumanlouh ziak un gamdai ah sihsak in a om uhi.
Israel-te phunchiak dan leh a thumanlouh dan uh muhtheih in om mahleh Pathian in hon sinsak nop leh a thumanlouh ziak ua gawtna a tuahte uh ei a ding in sinlai hoihtak a suak hi (1 Kor. 10:1-13; Heb. 3:7-13).
Israel-te ginom zou kei mahle uh Pathian itna leh dohzohna muh theih in om zelzel hi. Ei i ginom zohlouh sek hang in Pathian in hon it a, chiklai peuh a ei a ding a Amah naih theih gige ahi chih thei thakthak ni (cf.Neh. 9:16-21; Sam 78:14-39; 106:24-33, 44-46).
Unaute Toupa’ ni zingpha. Tuni kikhop nuam chiat