Huan, na lak uah ka biakbuk ka omsak ding a: ka hinna in nou a hon nungngatsan kei ding. Na lak uah ka teng ding a, na Pathian uh ka hi dia, huan, nou leng ka mite na hi ding uh. Kei TOUPA na Pathian uh, a sikha uh na hih louhna ding ua Aigupta gam a kipan a noute hon pikhepa ka hi; na hakkolte uh ka hihtan ding a, ding tang in ka hon paisak ding (Lev.26:11-13).
Leviticus laibu bei kuan ahih toh kiton in tuni a i tangteel bung 26 ah vualzawlna tuamtuam leh hamsiatna tuamtuamte gen in hong om hi. Hiai vualzawlnate tuh Israel-te a ginom ua Pathian thupiakte a zuih uleh a tan dingte uh ahia, hamsiatnate tuh thumanglou a aginom kei uleh a thuak dingte uh ahi. Deuteronomy 28 a kigelhte mah bang in hamsiatna kigente tuh vualzawlna kigente sang in a leh thum in a tamzaw hi.
Tuni a i tangteel tuh vualzawlna kigente lak a a tawpna ahia, thil hoihzaw a tan theihna ding ua Aigupta akipan pikhiak a om ahihdan uh imu thei hi. Pathian tuh amau toh ton a, amau lak a teng a, a Pathian uh hih a ut hi. Mite suak leh sal a om a, haksatna a tuah uh Pathian deihdan ahi kei hi.
Israel-te khangthu i et leh Pathian in vualzawlna piak achiam a tan zah sang un aleh thum phial a tamzaw ah hamsiatna kigente hon thuak kha uhi. Pathian in amau a ding a hoih pen vualzawlna penuam mah leh a thumanlouh ziak un a hamsiatnate a thuakzaw uhi. A genhakna uleh a kisaktheihna un Pathian vualzawlna a tan ding uh a dal hi.
Khristian-te leng Israel-te bang in ki-om khasek hi. Pathian thu i man louh ziak in i hinkhua a haksat ding sang mah in i haksa khasek uhi. Pathian deihdan a khosa ding a sapte ihi chih i thei a, himahleh i theihlouh ziak hilou in i thumanlouh ziak un i buai sek uhi.
Unaute zingpha. Tuni hun zatnuam chiat