Huan, Aron tapa, Nadab leh Abihu te’n a mei lakna uh a la tuaktuak ua, huai ah mei-am a koih ua, gimlim a buak ua, a thupiak louh pi in TOUPA ma ah mei zat louhchi a lan uh. Huchi’n TOUPA ma a kipan in mei a hong pawtkhia a, amau a kanglum a, TOUPA ma ah a sita uh. Huchi’n Mosi in Aron kiang a, Kei hon naih mite ah siangthou in ka lang ding a, mipite tengteng ma ah pahtawi in ka om ding, chia Toupa’n a gen tak hiai ahi, a chi a. Huan, Aron a dai dide (Lev.10:1-3)
Tuni a i tangteel tuh Pathian thupiak ahi bangbang zuihna toh kisai i sim tam mahmah uh Laisiangthou tang khat ahi. Aron’ tapate Nadab leh Abihu tuh Pathian be ding a kisa himahleh uh a sihloh hithet uhi. Hiai akipan ei a ding in leng zil theih om mahmah ding hi.
A thu om dan i en masa ding. Exodus laibu ah Sinai tang a lauhhuai tak a Pathian hong kilakna imu a, Israel mipite tang bul ah liing zen in a om uhi. Hiai hun ah Nadad leh Abihu a om kia uh hilou in, a vual masa (front row) a om dia seh a omte ahi ua, Pathian mute ahi uhi (Exo.24:9-11).
Huai nung in Leviticus 8 leh 9 ah siampu ding in siansak in om ua, haltum thillat leh khelhna thillatte hon laan uhi (Lev.8). Huchiin kihoupihna puan inn kongpi bul ah ni sagih sung a ngak uhi (8:35). Kisiansakna zou nailou ahihman un a sung alah lut thei nailou, mipi lak alah kik thei nawnlou, kik le uh akisiansakna abul a apat uh ngai zel ding dinmun in om uhi. Hiai ni sagih sung tuh Pathian siangthouna thute ngaihtuah a hun azat uh angai hi.
A ni giatni’n thupitak a zohna muhtheih in om hi (Lev.9). Thillatte hon lat beh zel nung un Toupa ma akipan mei (fire) a hong pawtkhia a, a thillatte uh a kangmangta hi. A biakna uh Pathian in a pompih chih imu a, huchiin mipi ten huai amuh un kikou zuazua in a khupboh khepkhup uhi (9:24).
Hiai thutuun (context) akipan tuni a i tangteel i tung hi. Nadad leh Abihu ten midangte sang mah in Pathian bangchituk a siangthou ahia chih a thei zaw tham ding uh; hinapi in a thupiaklouh pi in Toupa ma ah mei zatlouh chi in thillat a bawl uhi. A khelhna utuh a theihlouh ziak ua khial ahi kei ua, thei na sasa a, tupmawng leh khelh gamtat himhim ahi uh chih muhtheih hi. Pathian’ siampute ahihna uah midangte etzui ding, midangte ma a Pathian siangthouna gen a tangkoupih dingte himahle uh a sunintu in a pang uhi.
Tuni’n khristian tengteng Pathian’ siampute ihi uhi. Pathian thupiak i zuihna uah, i omdan leh gamtat dante ah amah siangthouna tawisangtute ihina hia, ahihkeileh amah sumelhemtu ihi zaw hia chih ki-enchian thakthak le ichi hi.
Unaute zingpha. Tuni hun zatnuam chiat.