Huaiziak in pasal in a nu leh pa a paisan ding a, a zi lam ah a belh ding: huchi’n sa khat a hong hita ding uh (Gen.2:24)
Tuni i tangteel in koppih i neih chiang i theih ngeingei ding leh nu-leh-pa ten leng a theihsiam ding uh agen om hi.
Pasal in a nu-leh-pa apaisan ding a, a zi lam ah a belh ding achi hi. Hiai in nu leh pa nuse ding, it nonlou ding, thulak nonlou ding, don nonlou ding, inn tuansan ding chih gen hilou hi. Himahleh koppih i neih chiang in i nu-leh-pa toh kikal leh i koppihte toh kikal khensiam poimoh mahmah hi. Koppih i neih chiang in i nu-leh-pa ngai sese lou a i koppihte toh i kikup ding leh i houlimna ding om thei hi.
Numei in pasal neih nung a pasal sang a anu-leh-pa kinaihpih zaw a, anu-leh-pa thu ngen a om asawm chiang in anupa kal uah kitheihsiam louhna om thei hi. Huchimah bang in pasal in leng a koppih neih nung a, azi sang a anu-leh-pa kinaihpih zaw a, thil teng a anu-leh-pa kia chi a, zite a thulak hetlouh chiang in zite a ding in haksatna om thei hi. Hiai in nupa kikal ah kitheihsiam louhna tun thei hi. Huaiziak in numei hi in pasal hitaleh koppih i neih chiang in i nu-leh-pate toh kikal i nutsiat zek ding om hi.
Hiai kizopna Laisiangthou gen nu-leh-pa ten leng theihsiam poimoh hi. Hiai i theihsiamlouh chiang in zi a neih leh, pasal a neih leh huchi, khachi kichihna om baih mahmah hi. Nu-leh-pa ten leng tate it mah le hang, koppih hon neih chiang ua khakkhiak zek tan theihsiam poimoh hi. Tate it lua, panpih lua a kingaihtuah a i va panpihna ten tate nupa kal ah kituahlouhna tun thei mawk hi. Hiai in ki-it lua nupate sa khat ahihna uh suse thei hi.
Unaute zingpha. Tuni hun zatnuam chiat