Laisiangthou sung a thu kigente leh thiltung teng Palestine gamsung neuchik leh a kim leh kiang a thiltung ngen ahi uhi. Gamdang toh kisai genkhak a omte leng hiai gam toh kisaikhakna leh kisukkhakna a om ziak a genkhak a om lel ahi uhi.
A gam kigenna minte
Laisiangthou apan imuh hiai gam a teng masapente tuh Noa’ tapa Ham’ khanggui akipan Kanan’ suan leh pakte (descendants) ahi uhi (Gen.10:6,15-20). Huaiziakin Kanaan Gam chi a gen in ana om masapen a, Thukhunlui ah hiai min kizang mun mahmah hi.
Pathian in Abraham’ suante adia ana chiam ahihziak in Gamchiam Gam (promised land) chih bang a leng gen in a om hi (Gen.12:7;15:18-21).
Abraham’ tupa Jakob tuh Pathian in a min Israel in kheksak hi (Gen.32:24-32). Huaiziakin Jakob’ suante tengteng tuh Israel mite chih in om ua, amau hiai gam hong luah in hong teng uhi. Huaiziakin hiai gam tuh Israel Gam chi a leng gen in a om hi.
Hiai gam neuchik tuh Palestine gam chi a leng theih in om hi. Himahleh hiai min pen Laisiangthou hun nunglam a hong kizang pan ahihman in Laisiangthou ah muh in omlou hi. King James Version ah “Palestina” chih thumal Exo.15:14 leh Isa.14:29,31 ah zat in om a, Joel 3:4 ah “Palestine” chih thumal zat in om hi. Himahleh hiai tangte ah Kanan simlam tuipi gei a phaizang (southern coastal plain) Philistia mite omna genna ding in kizang hi.
Jesu leitung a hong pai lai in hiai Palestine gam tuh Rome-te thuneihna nuai ah ana om hi. AD 70 in Rome sepaih ten Jerusalem sim in, Jerusalem temple tuh a susia uhi. AD 135 in Juda-te leh Rome-te kikal ah kidouna ana om nawn a, huchiin Rome ten hiai gamsung a Juda-te toh kisai thil om tengteng a suse vek uhi. Juda-te tampi thah a om ban ah, Jerusalem akipan nohkhiak in om vek ua, a khopi leng Rome-te deihdan a bawlthak in om hi. A gam min leng Syria Palestina chia khek in om a, huai hun akipan Palestine chi a theih in om tangpi hi.
A gam a teeng Pathian’ mite minte
Hiai gamsung a teeng Pathian’ mite min tuamtuam a theih in om uhi. Hebru mi, huai tuh “mikhual”, “gamdangmi” chi a gen in om masa pen uhi. Hiai min tuh Abraham genna ding in kizang masapen hi. Abraham tuh Ur a hong kipan ahihziak in a tualsung mi Kanan-te a ding in “mikhual” (stranger) ahihkeileh “gamdangmi” (foreigner) bang a theih in om hi (Gen.14:13). Abraham’ suan Israel mite tuh Aigupta gam a om lai un Aigupta mi ten Hebru mite chih in a thei uhi. Thukhunthak hun tan ah hiai thumal tuh Juda-te’ dan leh tawndan hoihtak a zui mite leh Greek’ mite hindan a khosate genkakna ding bang a zat in a om hi.
Israel-te ahihkeileh Isarel tate chih bang a leng gen in a om uhi. Thukhunlui Laisiangthou ah Pathian’ mite genna ding in hiai thumal a kizang mun pen hi. A thumal mahmah a leng Abraham suan ahihna uh genkha ahih ban ah Abraham kiang a gamchiam luahtute ahihna uh genkha ahihziak in Juda ten hiai min a deihzaw uhi.
Thukhunlui hun beikuan lam in Juda-te chi bang a leng gen in a om uhi (2 Kum.16:6). Solomon sihnung a Israel lalgam sehnih a hong kisuah in simlam lalgam, Juda gam a teng mite kia genna ding in kizang masa a, himahleh a khonung in Israel mi saltangte tengteng genna ding bang, saltanna apan hong kikte genna ding bang leh mun tuamtuam a Israel mi taidalhte tengteng genna ding bang in hong kizang hi.
Gam neuchik ahi
Hiai Palestine gam chu gam neuchik petmah ahi. Thukhunlui hun in Israel-te a ding in Dan khopi tuh mallam gamgi (northernly point) bang a ngaihsut ahi. Hiai Dan khopi apan simlam khopi (southernly town) Beersheba tuh miles 150 khawng lel a gamla ahi hi. A gam vailam letdan a kibang vek kei a, mallam ah Mediterranean tuipi apan Jordan phaizang tan miles 30 khawng lel ahia, simlam ah bel Gaza akipan Dead Sea tan miles 55 khawng in a lian hi. Palestine gam in Jordan suahlam bangzah hiam huamkha mahleh Kanaan gam chia Laisiangthou a kigen in bel Jordan tumlam gam lel a huamkha hi.
A sipsip in thei zoukei mah lehang leng gam lianlou, gam neuchik ahi chih theih haksa hetlou hi.
Gam poimoh ahi
Laisiangthou, Pathian’ thu toh kisai hikeileh hiai gam neuchik zak leng i zakkhak gintakhuai khollou hi. Agam kim ua teng namdang mite toh teh in um-leh-bel, khutsiam-silbawl ah thupizaw hetlou uhi. Himahleh namdang ten a phakzoh hetlouhna ubel a dan uleh a laigelh dan uh ahi. Nam thupi taktak namdangte laigelhdan toh Thukhunlui Laisiangthou i tehkhak chiang in, a pha zou om hetlou uhi.
Gam neuchik himahleh agam a omna mun fuh mahmah hi. Mediterranean tuipi leh Arabia gamkeu kikal ah om kha a, Asia leh Africa gambuppi (continent) sutuah gamhoih luah kha hi. Tanglai pek akipan khovel civilization lian taktakte kisumdawn tuahna lampi ah pang kha hi. Huchiin khovel ah gamhat leh lian hong kikhek touh zel dungzui in amaute kitehtuahna kal ah om kha sek hi.
Hoihtak a i ngaihtuahleh hiai Palestine gam pen Pathian in a namteel Israel-te ading a Gamchiam gam a ana teel pen a mawk teel banglou hi. Hiai gam a teng Israel mite toh nam tuamtuamte hong kisaikhakna un Pathian’ thu dalhzak sak baih mahmah hi. Alehlam ah Israel ten Pathian thupiak zuilou a milim khawng hon biak chiang un Pathian a ding in namdangte pansan a Israel-te gawtna piak zel baihsam mahmah hi.
Gam chituam ahi
Gamdang tuamtuam toh i tehkak leh hiai Kanan gam in chituamna tak nei hi. Gam neuchik sung ah a mipi (population) tam mahmah a; gam neuchik himahleh kholum-khovot omdan kibang hetlou hi. Tupi gei a om Joppa bang a tangpi in 20˚C hi a, tangsang zaw lam a om Jerusalem bang 18˚C vel hi a, Jordan phaizang lam Jericho bang Jerusalem akipan miles 15 vel a gamla himahleh nipi lam chiang in 43˚C bang tung thei zel hi.
Mallam akipan simlam en lehang leng tuabang in kholum-khovot om dan kibang hetlou hi. Mun lum gige Dead Sea akipan miles 120 (193 km vel) khawng lel a gamla himahleh Hermon tang bang vuk in tuam gige thei zel hi.
A gam melpuak dan ah Palestine gam baan mallam chet a om Lebanon tang bang feet 10,200 khawng in sea level sang in sangzaw a, huai akipan miles 120 khawng lel a gamla Dead Sea bang feet 1,292 khawng in sea level sang in niamzaw zel hi.
Thukhitna:
Khovel ah civilization thupi taktak, lalgam hat taktak, mi pil leh thupi taktak ana om tham mahleh, hiai lalgam neuchik sung a teeng, piang leh khanglian Jesu sang a khovel ana heilumlet zou kuamah ana omlou hi. Khovel pumpi hunsim dan leng amah hong pianma (BC) leh hong piannung (AD) in kikhen hilhel hi. Pathian ana omlou a, Laisiangthou pen hatkhum a gelh hilou a, mihingte hon bawltawm maimai hileh hiai thilte thil hitheivual hilou hi.+++