Huch’in Lot a pai khia a, a tanute kitenpih, a makpate kiang ah a va gen a, thou unla hiai khua a kipan pawt un, Toupa’n khua hihmang sin ahi, achi a. Himahleh a makpate ngaih in chiamnuih thugen bang lel ahi (Gen.19:14)
Genesis 13 ah Lot in Sodom lam ah a puan in a suan chih i mu a, a khosung a teng a bang nai kei hi. Himahleh Genesis 19 tan ah a khua a aten kia hilou in a tanute bang Sodom khomite toh kiteng om a bang hi. Bangziak a midik Lot in a tanute Sodomte toh kiteng dia pephal ahi de aw chih i thei kei hi. Midangte toh teh a mi hoih hiam, ahihkeileh a tanute tungtawn a thutak hilh a Pathian lau ding a pisawm ahi kha thei. A kisiamtanna ding hoihtak om leng ahi ding, himahleh tuni a i tangteel apan huaite tengteng diklou ahihdan muh theih hi. A makpate a hotdam zou kei a, a zi nasan leng a mangthang hi. A hotkhiak zoh sun a tanu nih ten a tung ah thil mulkimhuai tak hon hih ua, apa apan ta hon nei uhi. Hiai bang a thil chizauhuai koi apan hon zilkhiak uh ahi dia? Apa neu Abraham toh a kitenkhawm lai ua kipan ahi kei peuhmah ding a, Sodom mite gamtatdan apan hi ngeingei ding in gintakhuai hi.
Khristian tamtak ten leng khristian lou i kitenpih a i convert zoh leh tanchinhoih genna hoihtak himai lou hia chih ngaihdan neih a baihsam mahmah hi. Zite ziak, pasalte ziak a thutak hon mu a khristian ginom leh hoihtak i om tham hi. Himahleh hiai tuh thubaih ahi kei a, a tamzaw ah thutak a pizoh sang in manthat a baihlam zaw tham hi. Huaiziak in zi leh pasal i kizonna ah, nu leh pa ten tate koppih ding i zonpihna ah ngaihtuahna thuktak toh lungsim pethak lehang hoih mahmah ding hi.
Unaute zingpha. Tuni hun zatnuam chiat.