Siampu mukte’n theihna a kem un, a kam ah dan thu a zong ding uh ahi him a; amah lah sepaihte TOUPA sawltak ahi ngal a (Mal.2:7).
Thukhun Lui ah siampute tuh Levi nam kia akipan ahi ua, siampu lianpen tuh huai nam lak ah Aaron inkuan apan ahi hi. Himahleh Thukhun Thak ah i siampu lianpen Jesu Khrist ahia, Amah tuh Levi nam akipan hilou in Juda nam akipan ahi hi. Siampu hihna a kikhek ziak in dan thu leng a kikhekta hi (Heb.7:12). Thukhun Thak ah khristiante tengteng siampu i hi vekta hi (1 Pet.2:4-10).
Hebru laikhak gelhtu mah in khristiante’n i mohpuakna khat tuh sinsaktu (teachers) ahi achi hi: “A hun ngaihtuah in zaw heutu (English ah teachers) hi khinta hial le uh chin kilawm hiven…” (Heb.5:12). Hiai tang ah siampu hihna leh sinsaktu hihna ding chih tangtak in zom (directly link) kei mahleh Thukhun Lui hunlai a siampute mohpuakna pi khat tuh sinsakna ahia, Thukhun Thak ah leng khristian tengteng mohpuakna ahi thou hi.
Mi tengteng sinsaktu i hihdan a kibang vek thei khol kei ding hi (Jak.3:1). Himahleh mimal chiat ah i hih theihna om a, kuamah thadah thei ki-omlou hi. Siampu ihih chiat a, mahni khalam an kitoudelh thei ding khop a thutak i theih a poimoh hi. Huai kia hilou in, midang i lawm leh vualte leng hilh sawn thei dia kisin a hoih mahmah hi.
Pa aw, mial thuneihna lak akipan vak lamdang tak a na Tapa’ lalgam a non suanlutte ka hihna uah nang adia siampu ginomte hi thei din hon bawl in. Na thu thei nailoute kiang a hilhsawn thei din hon panpih in.
Unaute zingpha. Tuni hun zatnuam chiat.