Jesu Khrist hong painawn chiang in David’ laltutphah tung ah tu in Jerusalem ah kum sangkhat sung vai hong hawm ding chih sinsakna Premillennialism kichi hi. Premillennialism ichih thumal nih ‘Pre’ kichi ‘ma, malam’ (before) genna leh ‘millennium’ kichi ‘sang, sangkhat’ genna apan hong kilakhia ahia, kumsang malam chihna ahi hi. Huaiziak in Premillennialist ten Rapture, Antichrist, Kum Sagih Gimthuakna leh Armageddon kidouna chihte kumsang vaihawmna malam ah om ding chi’n sinsak uhi. Amau Kilakna 20 leh Thukhunlui a lalgam genkholhnate pansan tangpi in nei uhi.
Kumsang lalgam toh kisai mah in sinsakna lianpipi dang Postmillennialism leh Amillennialism kichi leng om a; himahleh Laisiangthou in bang chi’n agen a chihte suutkhawm zaw leng ichi hi.
Lalgam phuhkhiak ding genkholh in a om
Lalgam phuhkhiak a hong om ding ahihdan Thukhunlui hun a Zawlnei ten gendan tuamtuam in ana hah gen mahmah uhi. Daniel in Nebuchadnezzar’ mang a hilhchethna ah hichiin gen hi, “Huan lalgam lina sik bang in a hat ding a…huai kumpipate damlai in van Pathian in lalgam suksiat a om ngeilou ding, a thuneihna midang kiang a nutsiat a om ngei samlou ding, a hon dingkhe sak ding a; himahleh hiai lalgam tengteng a kitamnen sak ding a, a suse vek ding, amah bel tangtawn in ading diing hi” (Dan.2:40-44) chi hi. Lalgam lina tuh Rome lalgam ahihdan khovel khangthu (history) leh Daniel laibu ah imu thei a; huaiziak in Rome kumpite damlai a Pathian in lalgam khat phutkhe dek ahihdan gen ahi chih itheithei hi.
Lalgam naita ahi chih Johan leh Jesu’n agen uh
Genkholh a om bang in lalgam phutkhetu ding Jesu Khrist tuh Rome kumpi Caesar Augusta lal lai in ahong piang a (Lk.2:1-7), huchi’n “Kisik un, van lalgam a naita” (Matt.4:17), “…Pathian lalgam a naita. Kisik un…” (Mk.1:15) chi’n thugen hon pan hi. A nungzuite kiang ah “Na lalgam hongtung hen” chi in Pa kiang ah ana ngensak in (Matt.6:10), “Van lalgam, Pathian lalgam a naita” chih thu gen ding in a sawlkhia hi (Matt.10:4-7; Lk.9:1-6).
Baptistpa Johan in leng “Kisik un, van lalgam a naita” (Matt.3:2) chi’n ana tangkoupih hi.
Johan leh Jesu-te taksa a adamlai un bel lalgam phuhkhiak in om nai kei a, himahleh naita ahihdan bel itheithei hi.
Lalgam phuhkhiak hun ding Jesu’n agen
Lagam phuhkhiak hun ding toh kisai in Jesu’n, “…chihtaktak in k’on hilh ahi, hiai a ding a khente Pathian’ lalgam thilhihtheihna toh hongtung a muh ma ua sihna chiamlou hial ding a om uh” (Mk.9:1; Lk.9:27; Matt.16:28) chi hi. Hiai a ding achihte ‘a nungzuite’ leh ‘mipite’ ahi ua (Mk.8:34), Pathian’ lalgam hongtun tan a hingdam a om ding, silou ding om ahihdan uh agen hi. A khente a chih sese ziak in a si leng om ding uh; himahleh lalgam bel adamlai ngei ua phuhkhiak a om ding ahihdan a chiang hi.
Lalgam phuhkhiak in a omta
Jesu’n ‘lalgam tuh thilhihtheihna toh hongtung ding’ (Mk.9:1) ahihdan agen a, thilhihtheihna pen Kha Siangthou hongtun chiang a nei ding uh ahihdan a nungzuite ahilh hi (Nas.1:8). Huaiziak in Kha Siangthou hongtun peuhmah leh lalgam leng ahong tung chihna asuak hi.
Nungzuite tuh hilh a om bang un Pa’ thilchiam ‘thilhihtheihna’ ngak in Jerusalem ah a om ua (Lk.24:4; Nas.1:4ff), huchi’n Penticost ni’n Kha Siangthou hong tung a (Nas.2:1-4), Sawltak ten thilhihtheihna a neita uhi (Nas.2:11; 3:1-11; 6:7-8). Lalgam tuh Pentecostni in Jerusalem ah phuhkhiak ahita a; huaiziak in lalgam thu agenta uhi: “Pathian’ lalgam thu leh Jesu Khrist min Philip gen a gintak un, anumei-apasal in baptisma a tangta uhi” (Nas.8:12).
Jesu’n agen bang in lalgam tuh thilhihtheihna toh a hong tung a (Mk.9:1), huai thilhihtheihna tuh Khasiangthou hong tun in nungzui ten a nei uhi (Nas.1:8). Hiai tuh Zawlnei Danial in a genkholh bang in Rome kumpite lal lai ahia a; Jesu gen bang in a nungzuite damlai leng ahi. Jesu’n a khente damlai in a chih sese bang in a nungzuite lak a khat Juda Iskariot bel a sikhinta hi.
Lalgam ah nungzui masate behlap in a omta uh
Pentecost ni, Nasepte 2 a lalgam phuhkhiak ahihtak ziak in Nasepte 2 akipan Kilakna laibu tawptan ah lalgam genkhak ahih peuhmah chiang in a tungkhinta ngen a gen in a om hi. Sawltak Paul in, “A man tuh mial thuneihna lak a kipan hon suakta sak in a Tapa ittak lalgam ah ahon kaisakta” (Kol.1:13) chi a, Hebru laikhak gelhtu in “…lalgam hihlin vuallouh i tan ziak in, hehpihna i nei ding uh…” (Heb.12:28) chi’n lalgam tungkhinta ahihdan ana gen uhi. Sawltak Johan in Asia gam a Saptuam 7-te lai a khakna ah “lalgam hi ding a hon bawl” (Kil.1:6), “Jesu a om haksa thuakna leh lalgam leh kuhkalna a na unau uleh na tanpihpa uh” (Kil.1:9) chi hi.
Kumzabi khatna hun in khristiante tuh lalgam ah ana omta ua, lalgam phuhkhiak in a omta hi. Huaiziak in maban ah Jesu’n lalgam dang a hon phutkhe nawn kei ding hi.
Thukhitna:
Thukhunlui a genkholh a om bangbang in lalgam phutkhiak ahita, Part-2 ah lalgam tuh saptuam ahihdan leh Khrist in a lalgam sung a vaihawm lel ahihdan i entou ding.
Tulel a Jesu Khrist vaihawmna lalgam mi-leh-sa hih na ut a, amah toh vai hawmkhawm hih na ut leh Amah gingta in (Jn.3:16; Mk.16:16; Heb.11:6), Kisik inla (Nas.3:19; 17:30), Pathian tapa ahi chih kam a Gum in (Rom.10:9-10; Nas.8:36), na khelhnate ngaihdamna ding in Baptisma tang in (Nas.2:38; 22:16), huchiin Hotdam in na om ding a (Mk.16:16; 1 Pet.3:21), a lalgam mi na hi ding hi (Kol.1:13).+++
Aban na simnuam leh Park 2 click in: Part-2