Khenkhat ten thil a bawlkhelh ziak ua agah hoihlou a loh chiang un, Eden akipan i luahsawn eive chih ngaihdan khenkhat in nei sek uhi. Himahleh a kipahhuai mahmah bel Pathian in huai dan in hon enlou hi.
Mihingte Pathian in hon bawl ziak a om ihihman in i om ding dan hon bawlsak dan a i khosak chiang in i hinsan om hi. Himahleh Eden huan ah mihing Pathian’ melma, Setan zuaugen a gintak ziak un Pathian toh kizopna suksiat in om hi.
Genesis 1-3 in chitampi in mihingte hinkhua omdan om lak hi. Mohna neilou khovel ah i hong piangkhia a, Toupa mitmuh in i siangthou hi. Mi tamtakte sinsakna dan a khialsa a piang ihi kei hi. Ezek.18:4 in “kha khial peuhmah a si ding” chi hi. Pathian dan a i tatlek chiang in mikhial i suak hi (1 Jn.3:4). Khovel a i piankhiak pen Pathian a tatlekna hilou hi. Khelhna i va hih chiang in Pathian dam ah i talek hi. Adam, Evi leh thilsiam dangte mah bang in Pathian in hon et a, “a hoih ei” (it is good) hon chih hun om chiat hi.
Himahleh i hong khanglet touhna ah diklou ahi chih thei gegu a i hih teitei hun leng a hong om hi. Pathian deihdan thei napi a, Setan khemna ziak a khelhna i hih chiang in, Adam leh Evi bang a zuau gingta i suak hi. Huai hun tak in, a hoih pem Pathian mitmuh in khial a hong suak hi. Huchiin, Adam leh Evi mah bang in Amah akipan hawlkhiak in i om hi. A siangthou Pathian in a botloh mihing toh kizopna nei theilou hi.
Himahleh Pathian in mihing masate kiang ah a thoihdamna ding lametna ana pia hi. Pathian in khemtu Setan (gul) kiang ah, “nang leh numei k’on kidousak ding a, na suante leh a suante leng ka kidousak lai ding; huai in na lutang a sidup sak ding a, nang a khetul na sidup sak ding” chi hi (Gen.3:15). Hiai tuh mihing ten Setan i zohna theihna ding, zou kia hilou i sidupsak theihna ding genkholhna masapen ahi hi. Hiai tang in Jesu Khrist in tatna nna hong sep ding a gen hi. Huaiziak in Pathian in a bul tung akipan a pukmang mihingte tatkhiakna ding thilguan ana nei hi.
Hiai thuchiam tuh tuni in mihingte a ding in a taktak a hong suakta hi. Thukhun Thak in kross a Jesu Khrist hong si a, mihingte tatna nna hong sem ahihdan hon hilhta hi. Sawltak in hichiin ana gelh hi:
Ahihhang in, tu’n bel dan leh zawlneite na theihsak Pathian dikna tuh dan tellou a hihlat in a omta; huai tuh Jesu Khrist gintak ziak a, a gingtate tengteng a dia Pathian diktatna ahi. Lamdanna himhim a om kei: “mi tengteng in thil a hihkhelh ua, Pathian thupina a tan zohlouh nung un, Khrist a om tatna ziak in, a hehpihna a a thawn a siamtansak in a om uh; amah tuh a sisan ziak a thupha tawina hi’n, ginna a muh di’n Pathian in a luikheta. Hiai tuh Pathian dikna latsakna ding ahi, ama’n a dohtheihna ziak a nidanglai khelhnate a paikan tak ziak in; huan, amah ngei tuh adik a, chih leh Jesu a ginna nei mi tuh siam a tangsak chih chetna di’n” (Rom.3:21-26).
Tuni a Jesu Khrist tungtawn a Pa kiang na hon zot chiang in, Aman na pukna apan hon phong in hon honkhia a, huchiin siangthou leh ahoih in a hon bawl nawn hi. Siam a na omna san mah ah, Amah lalgam ah tui-um belsuan manpha in hon tungding thak nawnta hi.
A hotdamna thilguan ziak in Pathian kiang ah pahtawina om hen!
Hiaite i hinkhua ah bulh ni.
Unaute zingpha. Tuni hun zatnuam chiat