Huan ka etleh, angel khat van laizawl a leng in aw ngaihtak in, “Tunggik, tunggik, angel thum pengkul mut lai dingte leh huai ging hong om lai dingte ziak in leitung a omte tung agik,” achih ka za hi (Kil.8:13).
Tuni i tangteel a angel khat van laizawl a leng chia kilet pen Manuscript khenkhat ah eagle (eipau ah mupi, musane, muvanlai chi in kilet) chi in kigelh a, Greek thumal mah in leng huai a kawk thei hi. Laisiangthou ah mupi (eagle) tuh thahatna leh tuahsiatna lam toh kisai ah kizang mun mahmah hi (2 Sam.1:23; Job 9:26; Hab.1:8; Hos.8:1; Matt.24:28).
Pathian’ khut taklam a laibuzial Gakkipna Sagihna phel ahihlai a, angel sagihte lak a amasa 4-te’n abanban a pengkul a hon mut lai un, angel (mupi) khat van laizawl a leng ging tuh za in Johan a mu chih tuni i tangteel ah i theithei hi. Huai angel tuh aw ngaihtak a kikou in, “pengkul mut ding angel thum om laite pengkul mut dingte ziak in leitung a teeng mihingte a tung uh agik, a tung uh agik, a tung uh agik,” achi hi.
Khovel khangthu gelhtute’n (historians) Rome lalgam puksiatna pipen tuh thil thum ziak ahi chi vek ua, huaite tuh khovel tuahsiatnate (natural calamity), a sunglam ginatlouhna (internal rottenness) leh polam apat simna (outside invasion) ahi, chi uhi. Hiaite mah tuh Kilakna laibu ah chiamtehna leh gentehna a gen touhtouh in om hi. Pengkul masa 4-te tuh khovel tuahsiatna zang a Pathian vaulawkna ahi chih i genta a, hiai mah tuh a chiangzaw sem in Kilakna 16 ah Belkuang Sagihte (belhbu – bowl) ah muhtheih ding hi. Kilakna 9 a Pengkul Ngana leh Gukna-te ah a sunglam gitlouhna leh siatnate muh in om a, huchiin a tawpna Pengkul Sagihna ah polam apan simna (invasion) ziak a pukse ding ahihdan muhtheih hi.
Hiai thil tung ding kigente tuh a misiangthoute’ thumna (Kil.6:10) Pathian in a dawnna ahi chih i mu hi. Kumzabi khatna a khosa a hiai Kilakna laibu sim hilechin na ngaihtuahna ah bang om lang masapen din na gingta a? 2025 leh a nung a khovel a thil hong tung dingte na ngaihtuahna a om ding in gintakhuai hetlou hi. Na tung a vaihawm khristiante sawitu Rome kumpi giloute na mitkha ah om pah ding hi. Hiai mitkha a Kilakna laibu i sim kei leh a gen nop pipen theihkhelh baihlam mahmah hi.
Johan hun ah a misiangthoute’ thumna ziak a Rome kumpite tung a phubalakna ahia; tuni’n leng a misiangthoute’ thumna thawnlou ahi chih ngaihtuah thak ni. Pathian a din ei ginom peuh le hang, Aman ahun achih hun ah poimoh a sak bang in nna sem veve hi.
Unaute zingpha. Tuni hun zatnuam chiat.