Huaiphet in kei tuh Kha in ka omta a; huan ngai in van ah tuh lal tutphah a hong kitungta a, huan laltutphah tung ah mi khat a tuta a; Huan a tupa tuh jasper leh sardia suang bang in a kimu a; huan huai laltutphah kiimvel ah sakhituihup, emeraldi suang bang mai a kimu a zam hi (Kil.4:2,3).
Khenchiang in na thumna pai hetlou hileh kilawm in na om ngei hia? Ngeina dan maimai a thum minpu a om in na kithei ngei hia? Thumna bang ninhuai leh lamzang hetlou dan a na om chiang in bang na chi panlak dia?
Hiai dan a i om chiang hiai chiindan in nei le hang phatuam mahmah ding hi. Houchik abang na a ana chiing sin himhim mah dih. Na mitkha in kuahiam khat kiang a pau dan in na lungsim koih inla (focus), huai leng mi naran hilou in na Pa dan in ngaihtuah sawm in. Jesu’n “Ka Pa uh van a om” chia thum ding in a nungzuite ana sinsak hi (Matt.6:9). Na thumna Pa ngaihtuah inla, huai mah ah lungluttak a om teitei i sawm le chin na thumna lamzang tuan mahmah ding hi.
I thumnate phatna leh kipahthu genna toh i pat zel hoih hi. “Kuamah in a muh ngei louh, vak naih theih vuallouhna a Ompa” ngaihtuah sawm in (1 Tim.6:16). Amah na phat kawmkawm in, a Pathian hihnate ngaihtuah inla, seraf-te na san in leng a mai uh khuhkawm a, “Siangthou, Siangthou, Siangthou, lei pumpi a thupina in a dim” chia a kikou dante uh na mitkha in muhsawm in (Isa.6:2,3).
Pathian Thupi leh ka Pa uh, ka thumnate uh hon non ngaihkhiaksak a, bang ka hon gen ding uh chihte non lunglutpih ziak in kipahthu kon gen uhi.
Unaute zingpha. Tuni hun zatnuam chiat