Saptuamte kiang a Kha thugen bil nei peuh in za uhen. A vualzoupa kiang ah manna selguk ka pe ding, huan suangpek ka pedia, huai suang tung ah min thak, a neipa chih louh ngal theihlouh a kigelh a chi, chi in (Kil.2:17).
Tuni i tangteel a Pergamom khua a khristiante leh Kilakna gelh hunlai a khristiante tuh sawina nakpitak thuakte ahi uh chih i genta hi. I tangteel in a vualzoupa kiang a Manna Selguk leh Suangpak (suang ngou – white stone) piak dia chiam in om hi.Pathian in gamdai ah Israele kiang ah Manna ana pia a (Ex.16; Nam.11); huai Manna tuh Pathian’ bawm ah belneu khat a kepbit in om a, biakbuk a mun siangthoupen ah koih in a om hi (Ex.16:32-33; Heb.9:4).
Judate’n hiai Manna tuh Babylon kumpipa Nebukadnezzer in Jerusalem temple a suksiatlai in zawlnei Jeremiah in lakhia in Nebo Tang (Mount Nebo) a kawlhawm khat ah a seel chih gindan a nei uh chih Rabbinic writings Tadmuh (Yoma 52b) leh Midrash ah muhtheih hi (Yoma 5:3). Huai Manna pen Messiah in a lalgam a hong tunkhiak chiang in Judate’ kiang ah pekik nawn ding chih a kilametna uh ahi. Huaiziak in huai Manna selguk nekha mite tuh Messiah toh vaihawm khawm a a thupina a nuamsa dingte ahi uh chih Judate’n a gingta uhi. Tuni i tangteel a avualzoupa kiang a piak dia a chiam Manna selguk tuh a manpha mahmah hi.
Ei Paite Laisiangthou a Suangpek chia kilet English ah white stone kichi a, gendan dang in Suangpak, Suangngou chih theih ding hi. Rabbinic thugelhte mah ah hiai Suangpak tuh Manna toh hong kekhawm ahi chih gindan Judate’n a nei uh achi hi (Tamud – Yoma 75b cf. Sam 78:24). Tanglai (ancient) in thukhenna a bawl chiang un mohpaih a omte Suangvom piak pia ua, siamtan a omte hiai Suangpak a pe zel uhi. Huaiziak in hiai Suangpak tuh Pathian thilpiak manpha, siamtanna thupha piakna dan in a ngaihtuah uhi. Rome kumpite’n kimawlna a vualzou mite kiang ah Suangpak chikhat Tessera kichi a pe zel ua, hiai ngahte tuh a damsung teng un kimawlna mun (stadium) khatpeuh ah a manbei a lutthei ua, nakpitak in zahtakna angah uhi.Khristiante leng kitaiteh mite bang a sim ahi ua, a vualzou mite’n huchibang zahtakna i ngah diing uhi (1 Kor. 9:24-27).
Zan a hon paisan unaupa Songzapau in leitung a khualzin a zouta in hon paisan a, i suun a, himahleh Jesu’n hon chiam kipahmante mu ding in i gingtak ziak in lungsim a nuam hi. Ei a damlaite leng sih tanpha a ginom in, kipahman mu chiat thei din kisa ni.
Unaute zingpha. Tuni hun zatnuam chiat