Huan kei hon houpih huai aw muh tum in ka kihei hi. Huchi a ka kihei leh dangkaeng tuikuang koihna sagih ka muta hi. Huai tuikuang koihna lai ah kuahiam Mihing Tapa toh kibang, a khepek tuampha puansilh, a awm kimvel dangkaeng gakna a kigak ka muta hi (Kil.1:12,13).
Tuni i tangteel a Johan thilmuh i et leh “Mihing Tapa toh kibang” chih ah, “toh kibang” (English – like) thumal in 1:1 i genna a, Kilakna laibu tuh chiamtehna leh etsakna kampau a kigelh ahihna hon langsak hi. Mihing Tapa tuh a kivatna kigente dan a kivan taktak hilou in, ahihnate dramatic leh symbolic tak a hon lak ahi zaw hi. Tanchinhoih laibute ah Jesu Khrist genna ding in Mihing Tapa chih thumal 82 vei kizang a, Nasepte laibu ah khat vei leh Kilakna laibu ah nih vei kizang hi (1:13;14:14). Hiai in mihing ahihna leh Messiah ahihna hon langsak a; mihing a hong piang a hong khosak ahihna ah ei mihingte haksatna leh khemna i tuah hun panpih i ngaihnate hon theihpih mahmah hi (Heb.2:14-18).
Tuikuang koihna sagihte tuh saptuam sagihte ahi ua (1:20); Khrist tuh saptuam sagihte lak a om ahihdan Johan in amu hi. Rome kumpite’n khristiante thah chimit a sawm lai ua Khrist in a saptuamte taisan lou a alak ua om ahihdan amuh in nakpitak in khamuanna pe ding hi.
Tulai a pawl bawltawm tamtakte’n “Khrist thu kia gen unla saptuam thu gen kei un” achih sek uh a diklouhdan leng muhtheih hi. Sawltak Johan thilmuh in saptuam toh Khrist khentheihlouh ahihdan hon lak hi. Khrist thu i gen leh saptuam a itna thu gen ngai a (Eph.5:25), saptuam lutang ahihna gen ngai a (Eph.1:22), sinsakna diklou leh lepchiahna baanglou ahihna dia saptuam a awlmohna thu gen ngai hi (2:6, 15-16, 20-21).
A kivatna “a khepek tuampha puansilh, a awm kimvel dangkaeng gakna a kigak” chih thumalte’n Thukhun Lui a Levi siampute kivatna mitkha ah hon musak pah hi (Exo.28:4; 39:29). Hiai a kivatna in siangthou leh diktat ahihna leh siampu lianpen ahihna hon lak hi (Heb.7:26).
“Hichi in van mun a paisuak khinsa siampu lianpen thupitak, Jesu Pathian Tapa, i neih ziak in i thugin i pomkip ding uhi. Siampu Lianpen i hatlouh kitheihnate hon theihpih phalou nei i hi kei ua; eimah bang a lam tuamtuama khemna tuaksa, khelh bel khiallou, nei i hi zaw uhi” (Heb.7:14,15).
Unaute sunpha. Tuni hun zatnuam chiat