Huan, Paul kum nih vengveng amah inn khelh ah om a, a kiang a hoh peuhmah a na kipahpih a, Pathian lalgam thu ahilh a, Toupa Khrist Khrist thu leng hangsan tak in a gen zel a, kuamah in amah lah a kham kei uh (Nas.28:30,31).
Tuni i tangteel tuh Nasepte laibu tawpna ahi. Tangthu genkhit louh tampi toh tawp hi. Hiai ban Paul hinkhua la bang chi? Tan inn (prison) apat khahkhiak a om a diam? Ahihkeileh martyr a huai mun a si mai? Hiaite tengteng gen in a om kei hi.
Bang ziak a Luke in Paul hinkhua tawp tan hon genlou ahi dia? Houchik a dawnna tuh bang chi bang a tawp ahia chih aman le theilou hi. Paul tung a bang thil teng tung ahia chih a theihma a Theophil kiang a alaikhak ahi hi.
Himahleh Paul tung a bang thil tung ahia chih a poimoh pen hilou hi. A thu tuh Paul tanchin hilou in, Tanchinhoih dalhzak thu ahi zaw hi. Rome khopi, huai hun adia munpi pen, ah Paul hen a om himahleh daltu leh sukbuaina om hetlou in Pathian lalgam thu leh Jesu tanchin zalentak in a gen thei chih i theih tuh a poimoh pen ahi zaw hi.
Kuamah Tanchinhoih dalzou omlou hi. Juda makaite, Gentile mite, dawisiamte, tan inn, vuakna, suang a denna, long siatna, gul gu nei leh adangdang Tanchinhoih dalzou omlou uhi.
Nasepte laibu Tanchinhoih dalhzakna tangthu ahihleh, tuni’n nang leh kei leng huai tangthu ah i telkha hi.
Unaute zingpha. Tuni hun zatnuam chiat.