Mi chih a tung ua vaihawmte thuthu in om heh. Pathian thu lou in kuamah vaihawm a om ngal kei ua; vaihawmmi a omte Pathian seh ahi uh (Rom.13:1).
Vaihawmtu giloute kiang a bang chi kitahlut ding? Na zalenna leh dikna teng hon laksak a, sahkho zalenna hon pelou a, Jesu Khrist ginna ziak a hon sawi a, thuneihna tengteng mahni khut a koih a, a nialkalh peuhmah sawi a, zuau a vaihawmte kiang ah bang dia siah (taxes) pe di?
Oh! Tulel a vaihawmtute gen non sa uhia? Hilou hial. Kumzabi khatna a Rome lalgam dinmun leh Caesar vaihawmna gen ihi. Gendan tuam in tuni a i tangteel Paul in a gelh lai a Rome khopi dinmun ahi. Hiai laikhak khakzoh ahihnung kum tamlou in vaihawmtu Nero in khristiante tung ah thil mulkimhuai taktak bawl hi. Sahangte an leh meitohna vanzat (kindling to fire) lel a bang uhi.
Hiai bang dinmun a a-om lai uh ahi Paul in tuni a i tangteel ana gen. Khristiante tuh vaihawmte thu a om a, siah piak dingte pia a, tuabang a vaihawm giloute zahtak ding in ana hasuan hi. Huaiziak in gamsung mi hihna ziak a i zuih ding dan leh thupiakte, Pathian’ thu kalh ahihkei peuhleh i zuih tuh i hih ding him ahi. Hiai tuh amau thilhih a dik i chihpihna hilou hi.
Kumzabi khatna a khristiante’n Jesu Khrist thohnawnna ziak a ei leng thounawn ding ihi chih chian mahmah ua, huai a lametna uleh aginna ziak un hiai thute a zui zou uhi.
Hiai lametna a neihkip ziak a amalam a Paul’ kampaute en le hang:
- Pathian ei lam a apan leh kua’n ahia hon dou thei ding?
- Pathian mi teelte kua’n ahia hek ding?
- Kua’n ahia siamlouh tangsak ding?
- Khrist itna a kipan kua’n ahia hon khen ding?
Caesar hiam, lalgam hiam leh khovel thuneihna giloute’n hon khen zoulou ding hi. Vualtungtuangte sang a tungtuang zaw ihi!
Huaiziak in Caesar thilte Caesar kiang ah pe ni. Amah kineih hen. Amanna bei ahi. Tangtawn i paina ding mun ah huaite a zatna ding omlou hi.
Unaute zingpha. Tuni hun zatnuam chiat.