Na pil leh, nangmah a dia pil na hi. Huan mi na muhsit leh, nang kia’n na po ding hi (Pau.9:12).
Paunakte 7-9 in numei chi nih in tangval khat (young man) a sapna uh hon lak hi. Bung 7 ah numei hoihlou in hiai tangval pa hihse ding a asapna i mu hi. Bung 8-9 ah pilna, numei bang a gen a om in hiai tangval a inn a vualzawlna pe ding a asapna i mu hi.
Paunakte laibu a kipatna mah bang in bung 9 in leng a zohna hon bawl hi. Pau.1:7 in, “Toupa kihtak theihna kipatna ahi” a chih ban ah “mihai in pilna leh hilhna a musit” chih behlap hi. Pau.9:10 in hiai mah hon gen nawn ban ah, “musitmi bawl hoih in amah a ding in zumhuaina a mu a, Mipil kiang ah hilhna pe le chin, a pil zaw lai ding a” (9:7-9) achi hi.
Tunin teel ding (choice) i nei hi. Kiniamkhiak in thil teng thei veklou ihi chih pomtheih i kisin thei. Hiai tuh pilna kipatna ahihkia hilou in i hinkhua a Pathian in vualzawlna hon piaknop tampite i don theihna ding a thuguk leng ahi hi (9:11).
Alehlam ah kisatheitak a om in, Pathian’ thutak ngai nuamlou a om in i lungtang i taksak thei hi. Hiai lungput in maban ah kisikna hon tun ding a, leitung hinkhua kia hilou in i tangtawn a ding in siatna leh sihna hon tun ding hi.
Pa aw, na thugente hoihtak a ngaikhia a zuitu hisakthei lungtang pil hon pia in!
Unaute zingpha. Tuni hun zatnuam chiat.