Huan, Pathian in, i kibatpih in, ei mahmah bang in, mi i bawl dia, amau tuipi a ngasate tung ah, tung a leng vasate tung ah, gan tung ah, leitung tengteng tung ah thu i neisak ding, a chi hi (Gen.1:26)
Oneness Pentecotal ten Pa, Tapa leh Khasiangthou a tuam omlou in Jesu kia khenchiang a Pa, Tapa leh Khasiangthou a kikhektuah ahi achi uhi. Himahleh Laisiangthou a i muhdan in huai hilou. Pathian khat kia ahi a, huai Pathian khat ah mi (person) hihna tuam nei Pa, Tapa leh Khasiangthou om hi. Amau tuh thilsiamna ah tel vek uhi. Huaiziak in tuni i tangteel in, “Pathian (khat) in, i kibatpih in, ei mahmah bang in, mi i bawl ding” chi hi. Pentecostal-te sinsak dan hileh, i leh ei kichi thumalte zat theihlouh ding hi.
Laisiangthou mundang ah leng Pathian in hiai bang thumal, khat sang a tamzaw genna thumal a zat i muhtheih om hi: “Toupa Pathian in, ngai un, pasal a sia leh a pha thei in ei bang a hong hita” (Gen.3:22), “Toupa’n…Kisa un, i va hohsuk ding, pau a kitheituah theihlouhna ding un, huai lai ah a pau uh i va suk lamdang sak ding, a chi hi” (Gen.11:6,7), “kua ka sawl dia, kou a dia kua kuan ding ahia? chi’n, TOUPA aw ka za hi” (Isa.6:8). Hiai tangte a “i”, “ei” leh “kou” thumalte khat sang a tamzaw genna ngen ahi uhi.
Huaiziak in Oneness Pentecostal ten Jesu kia ahi chih a sinsak uh adik kei a, Pathian khat ah mi hinna tuam nei Pa, Tapa leh Khasiangthou om hi. Hiai gindan genna ding in Trinity kichi thumal zat in om a, Laisiangthou ah hiai thumal kimu chet kei mahleh a diklouhna omlou hi. Jesu hong painawnna ding genna in Second Coming thumal i zang a, himahleh hiai thumal chet leng Laisiangthou ah muh in om tuanlou hi.
Unaute zingpha. Tuni hun zatnuam chiat