Kumpipa Daria lal kum nihna, kha gukna, a kha a a ni khat ni’n, Juda ukpipa Sialtil tapa Zerubbabel kiang leh, siampulian, Jehozadak tapa Josua kiang ah zawlnei Haggai a kipan in TOUPA thu a hongtung a. Hichibang in sepaihte Toupa’n thu a gen, Hiai mite’n, eite i kisak hun uh ahi kei, TOUPA inn lam hun, chi’n (Hag.1:1,2).
Zawlnei Haggai laibu tuh laibu tom chik, a vek a tang 38 kia omna bu ahi. Himahleh a “Toupa’n hichi’n achi” kichi thuvual a tam mahmah ziak in a thugente a hiam thei mahmah hi. “Toupa’ thu” (word of the Lord) kichi thuvual 5 vei, “Toupa’n hichi’n achi” (says the Lord) kichi thuvual 8 vei, “Toupa’n achi” (declares the Lord) kichi thuvual 9 vei muh ding a om hi. Hiai thuvualte ban ah “Toupa’ aw” (voice of the Lord) chih bang in leng agen hi (1:12). Huaiziak in Haggai tuh “Toupa’n a gen thute puangkhetu zawlnei” chih bang (1:1, 3, 12; 2:1, 10) leh “Pathian’ thu vaikhah (LORD’s message) genkhetu zawlnei” (1:13) chih bang a gen in a om hi.
Tulai a thu kigente toh bang chi i sa a? Hiai tang 38 sung lel ah Haggai in 30 vei sang a tawmzaw lou a thugente Toupa akipan ahihdan agen hi. Thugenna leh Bible class khenkhat bang ah Laisiangthou tang khat leng simkhiak khaklouhna hun a om sek hi.
Zawlnei Haggai bang om hileh bang ngaihdan a nei de aw chih bang lungsim ah ngaihtuah theih hi. I thiltup ding leh i sep ding hon hilh ngei din gintakhuai hi. Ei tanchin hiam, ei pilna hiam, ei theihna hiam ahihkeileh ei nungzui ding bawl sawm hiam i hi kei hi. Thupinate Pathian pia a, a thu tungtawn a mite kheksawm hi zaw ihi chih mangngilh louh poimoh hi.
Huan, unaute aw, kei zaw Pathian thuguk nou hon hilh ding a na kiang ua ka hong lai in, thu gen thupi leh pilna thupi toh hong ka hi kei hi. Jesu Khrist, amah mah kilhden a om thu kia lou ngal na lak uah bangmah himhim theih ka tum kei hi (1 Kor.2:1,2).
Pa aw, mihing pilnate hilou in na thu in thil a hihtheih dan ka gin sem theihna ding un hon panpih in.
Unaute zingpha. Tuni hun zatnuam chiat.