Kumpipa sikhate tengteng leh, kumpipa bialte a mite’n a thei kilkel uhi, mi kuapeuh mah, pasal zong numei zong, sap louh a, kumpipa pisa sungnung zaw pen a a hong uh leh, amah a ding in dan khat a om a, sihsak ding, a chi a, kumpipa’n dangka-eng lalchiang a letkhumte chihlouh ngal: himahleh hiai ni sawmthum kumpipa kiang a hong pai ding in sap in ka na omta kei hi (Esther 4:11).
White House (America President omna) ah lawm hoih khat nei a, huai na lawmpa tungtawn a White House na ut hunhun a hoh thei a, America President pa toh kimutuah a na hatsatnate genkhawm gige theih dan in kingaihsun mah dih. Khovel a mi thupi pen in na lawmpa ziak a na hatsatnate hon khawkngaih pih mahmah bang hileh, hiai bang lawm hoih na neih khak hampha na kisa diam?
Ataktak ah hiai bang thil tuh thil om thei ahi kei hi. Himahleh kua hiam khat, ei adia hon gensak thei gige, khovel kumpite tung a thuneitu toh kihouthei gige a i om theihna mi khat a om hi. Amah tuh i Toupa Jesu Khrist ahi.
Huchi’n, zahngaihna i muh theihna ding leh huh i deih chiang a huhna hehpihna i muh theihna di’n, hehpihna mangtutphah tuh hangtak in i naih ding uhi (Heb.4:16).
Unaute zingpha. Tuni hun zatnuam chiat