Na ma ah ka ngetna uh pom hi hen la, hiai omsun mi tengteng a ding ngei in na Pathian kiang ah hon thumsak ding in k’on ngen uhi; na hon muh bang ngei in mi tampite lak a kipan tawmchik kia nutsiat in ka omta uhi. TOUPA na Pathian in ka paina ding thil uh hon kokmuh theihna ding in, a chi uhi (Jer.42:3,4).
Babylon kumpi Nebuchaddnezar in Jerusalem hong sim zoh in sal a apilouh Juda gam a omlaite a ding in Gedaliah tuh amah tang a Juda gam ukpi (governor) ding in a bawl hi (Jer.40:5; 2 Kum.25:22). Himahleh Juda kumpi chi (royal family) akipan Ismael in hong that a, a kiang a om mi teng sal api in Amon mite omna a zotpih sawm hi. Himahleh Kare tapa Johanan leh a kianga sepaih heutu om ten hong hunkhia ua, Babylon ten hong doukik ding uh a lauh ziak un Egypt (Aigupta) gam ah pai a sawm uhi (Jer.41:18).
Juda gam nusia a Egypt gam pai atup utuh Pathian deihdan hihsak tum in tuni a i tangteel a i muh bang in zawlnei Jeremiah kiang ah hon thumsak inla, Pathian hon dotsak in hong chi uhi. Jeremiah in leng a ngetna bang ua Pathian kiang a ngetsak ding ahihdan agen a, huchiin amau Jeremiah kiang ah, “Toupa na Pathian in ka kiang ua nang a honsawlna thu tengteng bangzel a ka hihkei uleh ka lak uah Toupa thu theipa dik leh muanhuai hi hen” achi hial uhi (42:5).
Hiai a dawnna uh etzual in Pathian thupiak bangbang zui ut, zui ding a mansa a bang uhi. Himahleh Pathian in Egypt gam a apai ding uh a phal kei a, Juda gam ah om le uh humbit ding ahihdan leh A thupiak kalh a apai teitei uleh gawt ding ahihdan agen hi. Pathian’ dawnna zawlnei Jeremiah in hon gentak in, amau “Zuau gen nahi, TOUPA ka Pathian un, Aigupta gam a teng ding in na pai ding uh ahi kei, chi a gen ding in nang a hon sawl sam a” (Jer.43:2) chi’n Jeremiah a ngoh maimah uhi. “Huchi’n Kare tapa Johanan leh sepaih pawl heutu teng leh mipi tengteng in Juda gam a teng ding in TOUPA kam a mangta kei uhi” (43:5).
Khristiante leng hun tamtak ah hiai Johanan leh a heute mah i bang kha sek hi. Pathian’ deihdan leh a thu ahi bangbang zui ut hilou in a kiang ah i thum sek ua, i lungsim lah i deihdan leh hoihsak dan Pathian’ deihdan hihsak ut i hikha zawsek uhi. Pathian thu toh kituak a i omdan khek sang in, i omdan toh kituak a Pathian’ thu khek a awlsam zaw sek hi. Huaiziak in ei toh kituak a Pathian’ thu kai hilou in, Pathian’ thu toh kituak in i omdan kaihsawm zaw ding in panla thak ni.
Pa aw, kou deihdan hilou in nang deihdan in kihih zel hen.
Unaute zingpha. Tuni hun zatnuam chiat.