Ngai dih, nite a hongtung sin, chih TOUPA thu pawt ahi: huai nite ah Israel innkote leh Juda innkote kiang ah thukhun thak ka bawl ding. A pipute uh Aigupta gam a kipan a pikhe ding a a khut uh ka let ni a ka thukhun bang hilou in, amau dia heute (husband) ka hih in leng ka thukhun a bohsia ua, chih TOUPA thu pawt ahi (Jer.31:31,32).
Jeremiah laibu i sim leh thu kipahhuai muh ding omlou a bang phial hi. Pathian mite’n Pathian zuausan a, a thupiak angaihsak louh ziak ua, amaute kiang a vauhilhna gen Jeremiah nasan ngohna diklou pipi a angohnate uh i sim leh “Zawlnei kapneh” chih in a om hial na mah a, Pathian’ mite khelhna ziak a alungkham ding dan theihsiam huai mahmah hi.
Lametna mawngmawng omlou khop a a-om lai in tuni i tangteel apan in Pathian in lametna vak kiukiau musak a, Thukhun Thak bawl ding ahihdan agen hi. Jer.31:31-34 kikal tuh Thukhun Thak gelhtu ten Thukhun Lui Laisiangthou akipan a laksawn (quote) teng lak ua a saupen ahi hial hi.
Tuni a i tangteel hoihtak a i et leh Pathian in, “ka mite’n kei toh Thukhun Thak hon bawl ding uh ahi” chia, a mite hih ding gen hilou in, Amah mah thilhih ding gen in, “Thukhun Thak ka bawl ding” chi zaw hi. Huaiziak in Thukhun Thak tuh mihingte hilou in, Pathian mahmah in hon bulpat ahi chih kimuthei hi.
Israel ten thukhun masa abohsiat kia uh hilou in, Pathian lungtang leng suna kha uhi. Pasal in azi kiang a ginomna thukhun a bawl bang in Pathian in leng a namteel Israelte toh thukhun bawl a, himahleh Israel ten khalam angkawm san in Baal, Asthoreth, Molech leh pathian lem tuamtuamte lam ah kiheisan maimah uhi. Himahleh Pathian a thukhun ah ginom a, a mite toh a kilemkik theihna ding in a tapa Jesu Khrist tungtawn in thukhun thak hon bawlta hi.
Huai Thukhun Thak a Pathian toh kilemthei ihihman in hamphat huai ahihdante thei thak in, i hihtheih tawp in i Pathian a din panla thak ni.
Unaute zingpha. Tuni hun zatnuam chiat.