Huchi’n Jeremia in Zedekia kiang ah, TOUPA, sepaihte Pathian, Israel Pathian in hichi’n a chi, Babulon kumpipa heutute kiang ah na kipiak leh na hinna na bitsak ding a, hiai khopi leng a kang kei ding, nang leh na innkote leng na hing ding uh. Babulon kumpipa heutute kiang a na kipiak kei lebel hiai khopi Kaldai khut a piak ahi ding a, a hal ding ua, a khut ua kipan na suakta het kei ding, a chi a. Huan kumpipa Zedekia in Jeremia kiang ah, Kaldai mite kiang a kipia Judate khut ah a hon mansak in nuihzat in a hon bawl kha ding uh ka lau ahi, a chi hi (Jer.38:17-19).
Tuni a i tangteel tuh Babylon ten Jerusalem a hong sim dek ua zawlnei Jeremiah in kumpi Zedekiah kiang a, kipekhe mai dia a genna ahi. Pathian vauhilhnate ngaihsak kei mahle uh Pathian in Jerusalem khopi humbit a a-om theihna ding leh amah leh a inkuante hinna a humbit theihna ding in Babylon-te khut a kipekhe mai ding in agen lai hi. Himahleh kumpi Zedekiah in Pathian thupiak a nelhsiah a, huaiziak in khopi a humbitlouh kia hilou in a mitmuh mahmah ah a tapate thah in a om a, ama mit ngei leng a lakkhiaksak uhi.
Mi tamtakte tuni a i tangteel a kumpipa Zedekiah mah a kibang sek hi. Pathian’ thugente ngaihsak lou in, A thu tungtawn a avauhilhnate kinelsiah kha sek hi. I khelhna gah (consequences) i tuah dingte i zaksa leh i theihsa himahleh huai in i omdan hon khek tuan kei hi.
Huchiin thuakna a hong tung a, i khelhna gahte mah in i mai a hon khen sek hi. Chimoh kisa in, zawlneite (hiai bang hong tung ding ahi chih genkholtu) kiang mah ah hasotna ngen in i taikik sek a, himahleh kintak a i bawllem theih a om kei sek hi.
Ahihhang in thildik hih adik gige hi. I thildik hih in i khelhna gute (consequences) a beisak vek tuan kei a, himahleh i thildik hih in i lungsim tawng ah tawldamna hon pia a, Pathian leng a kipak hi. Huai kia hilou i khelhna gah i thuak dingte leng a nepsak deuh thei hi.
Unaute Toupa’ zingpha. Tuni kikhop nuam chiat.