Huan a kha sawm-le-nih, Adar kha, huaimah a ni sawm-le-thum ni, kumpipa thupiak leh a thubawl tangtunna ding a hong nai lai, Judate melma te’n a tung ua vaihawmna neih a kilamet ni uh; hinapi a lah a hilou lam a a hong kilehbut a, Juda te’n amau mudahte tung a vaihawmna a hon neih lai un (Esther 9:1).
Esther laibu i sim leh thil a kilehbulh (ironies) tam mahmah hi.
- Kumpipa Ahasuerus in kumpinu Vashti sam a, himahleh Vashti a pailouh ziak in a dinmun a taan loh hi. A khonung in kumpipa thupiak louh in Esther ava lut a, himahleh deihsakna a ngahloh hi.
- Juda mi, Mordekai in Haman zahna pia in a kun ut kei a; a khonung in Haman in Juda mi, Esther mai ah zahna pia in akun angai hi.
- Haman tawisangtu kumpipa Ahasuerus mah in a dinmun a niamsak hi.
- Juda mipi’n an a ngawl ua, huchiin nekkhawmna a nei thei uhi.
- Mordekai adia a bawlkholhsak khailupna khuam tung ah Haman a khailum in a om hi.
- Haman in zahtakna amah tan dia kumpipa a bawlsak teng Mordekai a khusak in om hi.
Thil kilehbulhte lak a thupi penpen tuh tunni i tangteel ahi. Judate’ melma ten Pathian mite hihsiat a tup ni mahmah un a vuallel zaw maimah uhi.
Hiai apan i muhtheih om in na thei hia ? Setan in leng Pathian tapa kilhlum a vualzou a akingaih ni tuh amah leh amah tangtawn adia a kihisiat ni ahi zaw maimah hi.
Pa aw, na pilna leh koute hon hotkhiak theihna dia na thil hihte lamdang in thupi kasa ua, Dawimangpa’n koute hon douna lam a amah leh amah na kihihsiat sak ka kipak mahmah uhi.
Unaute zingpha. Tuni hun zatnuam chiat.