Huan, Saul in David aw a thei a, tua na aw hia, ka tapa David? a chi a. Huan, David in, he toupa, kumpipa aw, ka aw ahi a, a chi a. Huan, bangziak in ahia ka pu’n a sikha a delh? Bang thil ka hih a ahia? a khut ah thil gilou bang a hia om?, achi hi (1 Sam.26:17,18)
David in Saul a ding thilsia bangmah a deihsak het kei a, thil hoih a deihsak zaw hi. Saul a ding in sikha ginom leh sepaih ginom ana hi gige hi. Saul thah theihna hun lemtang nihvei tak a mu a, himahleh a that nuam kei hi. Hinapi in Saul in David thah tum in a delh den hi. A ginomna leh a mi hoihna tengteng ziak in gentheihna leh lungkhamna a tuak den zaw hi.
En leng i hinkhua ah hiai bang gentheihna leh lungkhamna tuak hi a i kitheih hun a om sek hi. Hiai bang hun in David hinkhua akipan in bang ziltheih i nei a?
- Saul zahtakna a pe teitei a, “ka toupa” leh “kumpi” chi a sam in, amah mah “sikha” chi in a kigen hi.
- Thil hoihlou, hoihlou in a thuk ut kei hi. Pathian sathau nilhsa tung ah a khut a kha ut kei hi. Saul in amah lam ah a hih ding hih kei mahleh Pathian in kumpi a abawl ahihziak in zahtakna a pe teitei hi.
I tung a thunei zaw leh lianzaw a Pathian in a koihte tuh amau phu (deserve) kei mahle uh zahna piak teitei tuh thilhoih ahi. Amau dem a muhsit sang in a hoihlouhna uh zahtakna toh hoihna ah zou lehang a vualzou kihi zaw ding hi.
Unaute nitakpha. Kuapeuh mangpha leh ihmut lim chiat