Huan, hichi a hong hi a, Jehudi in khep thum hiam khep li hiam a sim in kumpipa’n a temta in a at tan a, thuk mei ah a zial bu pum kang mang vek ding in a lawn lut zel hi. Huan, kumpipa leh a nnasem mi’n hiai thu tengteng ngaikhia mite kuamah a lau kei ua, a puansilh uh leng a botkek sam kei uh. Huai phet hilou in Elnathan leh Delai leh Gemari te’n laibu zial hal lou ding in kumpipa kiang ah a ngen ua, himahleh a ngaikhe nuam kei (Jer.36:23-25).
Zawlnei Jeremiah tuh Juda kumpi Josiah kum sawm-leh-thum a lal kum a Pathian in zawlnei ding a asap ahi (Jer.1:2). Josiah a sih nung in a tapa Jehoiakim hong lal a, a lal kum li kum in Pathian in Jeremiah kiang ah, “Kon sapni akipan tuhun tan a Juda inkote tung a thilhoihlou ka hih ding ka vaukholhna tengteng laibu zial ah gelhkhia in” chi’n a sawl hi (36:1-3). “Michih in a omdan gilou uh a tawpsan ua, a thulimilouhna uleh a khelhna uh ka ngaihdam theihna ding in” achi hi (36:3,7).
Tuni a i tangteel tuh hiai laibu zial simkhiak a hong hih a, kumpi Jehoiakim in ngai utlou a ahalna thu ahi. Kumpi Jehoiakim omdan tuh a pianna pa kumpi Josiah gamtatdan toh kilehbulh hithet hi. Apa’n dan laibu a thute a zak in mikhial ahih kiphawk in a puante a botkek a (2 Kum 22:11-13; 2 Kron 34:19-21), himahleh Jehoiakim in bel a puansilh botkek lou in, laibu zial a botkek a, huai tan lel aleng lungkimlou in, mei ah hal in a kangtum sak hi.
Hiai khang khat (one generation) sung lel in leng a inkuan sung uh Pathian’ thu a akikhek lamdang kin dan muh theih hi. Ei khristiante a ding in leng hiai bang a khalam kikhek lamdang a baihsam mahmah kha ding hi. Pathian’ thutak leh saptuam leng i khang-khang in a paisawn den ding chihna (guarantee) omlou hi. Huaiziak in khangsawnte’n Pathian’ thu hon mansuah louhna ding un tuni a khang om lel ten mohpuakna liantak i nei hi.
Inkuan leh tualsung saptuam a manthat theihna khang khat (one generation) kia in sam ahi chih phawk kawm a pan i lakthak uh kisam hi. Khang hong tung zel dingte kiang a thutak khaksawn din kuhkal tak in panla ni.
Unaute zingpha. Tuni hun zatnuam chiat.