Gentheite kiang a tanchinhoih gen ding a Toupa’n thau hon nilh ziak in Toupa Pathian’ kha ka tung ah a om; ama’n, lungtang khasiate tuam ding bang, salte kiang a pawtna thu leh mi tangte kiang a taninn (prison) honna thu gen ding bang (Is.61:1).
Tanchinhoih gen tuh hehpihna nasep (act of compassion) chi khat ahi. Hinkhua leh lungsim liamna neite, kisete, mi phawkbat louhte leh mi gentheite kiang a khovel in a piak theihlouh kipahna tutna chi khat ahi hi.
Jesu Khrist tangthupha midangte kiang a i gen pen mahni kisaktheihna ding, mahni kitawisangna ding leh mahni kithupisakna ding nasep hilou hi. Khutdoh khat in khutdoh dang nek ding omna a hilh toh kibang lel hi.
Pa aw, na hon itna kou mau mahmah in theichian thakthak a, nang non et bang a kou leng midangte ka ettheih sam ua, na tanchinhoih thasial hetlou a midangte kiang a ka hilhsawn zel theihna ding un hon panpih in.
Unaute zingpha. Tuni hun zatnuam chiat.