Huan, siampu in tatlek thoihna sisan a la ding a, kisiang sak ding mi bil tak lam mongte, a khut taklam khutpite, a tak lam khepite siampu in a nuh ding hi (Lev.14:14)
Tuni a i tangteel leh Leviticus 14 pumpi ah phak natna neite siansak ding dan kigen hi. Phak natna tuh siampu in siangta ahi chia a puankhit chiang in, ni sagih sung kisiansakna thilhih tuamtuamte hih ding a (14:1-9), huchiin a ni giatni in belamnou nih laan ding hi. Siampu in tatlek thoihna sisan la ding a, a bil taklam mongte, a khut taklam khutpite leh a taklam khepite ah nuh ding hi. Hiai kisiansakna toh kibat geih in siampu diingte leng siansak a om in, a bil, a khutpi leh khepite ah sisan kinuh hi (8:23-24). Bangziak a phakte leh siampu diingte hiai bang a siansak a om sese uh ahia chih Laisiangthou ah kimu chetlou hi. Himahleh hiai taksa kahiangte i pumpi ah khelhna tamtak hon tuntute hi ua, huaiziak Pathian in i kampau (bil tungtawn a i zakte), i nasep (khut akipan) leh kalsuannate (i khe tungtawn ah) ah siangthou ding hon sinsak nuam ahi chih ensak hi ding in gintakhuai hi. Pathian in i taksa kahiang pumpi kithoihna hing leh siangthou, Amah lungtuak ding a kilaan ding in hon deih hi (Rom.12:1-2).
Pa aw, ka khut uh, ka khe uleh ka taksa hiangte tengteng uh na deih bang a na zattheih ding in hon hih siangthou sak in.
Unaute Toupa’ ni zingpha. Tuni kikhop nuam chiat.