Huan, mi’n sihna khop gilou a hih a, hihlup a hih a singdawna na khai uhleh; A luang sing ah zankhua in a om ding ahi kei a; huai ni mahmah in na vui ding uhi; sing a khai peuhmah lah Pathian hamse thuak ahi ngal a; TOUPA na Pathian un luah ding a a hon piak na gam uh na hihnit louhna ding un (Deut.21:22,23).
Hiai thumalte Thukhun Thak ah Sawltak Paul in hon gensawn in, “Khrist tuh ei sik a hamsiat in a hong om a, dan hamsiatna a kipan in a hon tankheta-Sing a khailup peuhmah zaw hamsiat hi hen, chih gelh ahi ngal a” hon chi hi (Gal.3:13). I Toupa Jesu tuh kross (sing) a khai a om in, eite taang in hamsia a thuak hi.
Mosi in hatkhum a hiai thute ana genlai in Khrist thuakna ding gen ahihlam ana theilou hi (1 Pet.1:10-11). Huaiziak in hiai thutak kum 1500 nung a thupitak a hong tun ding ana kipahpih di bang in ana kipahpih theilou hi.
Ahihhang in, hiai thutak gen ding a Mosi theisaktu in bel theichian mahmah hi. Pathian in “sing a khai peuhmah hamse thuak ahi” chih thu hon genkhiaksak lai in bang bang chituk in a lungtang a hetkha dia chih a thei kuamah omlou. Mosi na ngawn in leng theilou ding hi. A gelhsaktu Pathian lungtang zaw na mahmah ding hi ven maw!
A thu kia sang mah in, a Tapa tang neihsun sing a khai a hong om taktak hun in zaw na zaw lai ding hi. Hamse thuak a sing a khai a om mai maw!
Pa aw, tu zingkal in na Tapa muchian zaw sem thei din hon panpih in. Na lungtang a nat ding dan hon theichian zaw sem inla; tuasang a khelhna ho zaw sem thei din hon panpih in.
Unaute zingpha. Tuni hun zatnuam chiat.