Huan, hichi ahi a, Elija in huai a zak in a puan inn a mai a khuh a, ava pawtkhia a, kokhuk kongpi ah a va ding a. Huan, ngai in, aw in a kiang ah, hiai ah bang na hih Elija? a hong chi a. Huan, ama’n, Toupa, sepaihte Pathian a ding in phatuam ka nei mahmah zel a, Israel suante lah na thukhun a lehngatsan ua, na maitam te a chimsak ua, na zawlneite namsau in a satlum ngal ua; a omlai kei ka hia, ka hinna hon lak sak a tum uh, a chi hi (1 Kum.19:13,14).
Elijah tuh Pathian zawlnei thupitak himahleh tuni a i tangteel a i muh bang in tawl kisa, sih ut hial khop a ning kitel a thawmhau thei ahihdan muh theih hi.
Khristian-te leng Zawlnei Elijah bang a lungkhia a, thawmhau kisa a, hin man omlou khop a kingaihsiatna toh hinkhua kizang thei hi. Himahleh Elijah bang a Pathian in i maban kalsuanna ding hon bawlpih, i haksatnate hon zohpih a, thupizaw sem a hon dinmun hon penuam ahi chih mangngilh louh kisam hi. I haksatna leh lungkiatnate mah den chiang a i kipahna ding hi nuam zaw hi. Huai ding in ngakzoh a Pathian deihdan mah lepkip ngai hi.
Khristian mi malmalte ban ah saptuam makai leh thu nnasemte leng mihing mah ahihziak un lungkiat hun nei thei, tawlsa kisa a thawmhau thei gige ihi chih kitheihtuah poimoh mahmah hi. Pathian’ thutak gum a kuhkal tak a i pang lai in leng, Pathian’ tate nasan in gumlou a hon kiheimansan chiang un thawmhau hun om thei tham hi.
Huchimah bang in khristian khat leh nih a omna mun ua amau kia thutak zui ahihna mun uah thawmhau kisa in om thei gige uhi.
Huaiziak in khat leh khat kithumpihtuah a, kihasuantuah poimoh gige hi.
Unaute zingpha. Tuni hun zatnuam chiat