Huan, huai lai ah lamlian a om ding, kongpi toh, huai tuh Siangthouna Lampi a chi ding uh; mi thanghuai in lampi a tawn kei ding; a hih bang in huai mite a ding in a hi zaw ding; mi vialzinte, ahi, mi haite leng, huai lai ah a mang kei ding uh (Is.35:8).
Sianthouna (holiness) tuh khristiante sap a i omna san leh Pathian in hon ngiat thil ahi. Jesu’ sisan a siansakte ihi ua (Heb.13:12), siangthou ding a sapte ihi uhi (1 Pet.1:16). Israelte mah bang in siampu siangthou leh nam siangthou chia sapte ihi uhi (1Pet.2:5,9). Huaite ban ah temple siangthou chia sap ihi ua (Eph.2:21), thil nin peuhmah akipan kisiangsak dia sap leng ihi uhi (2 Tim.2:21; 2 Kor.7:1). Sianthouna lou in kuaman Pathian mu theilou hi (Heb.12:14).
Pathian deihdan leh hon lametna bang a siangthou kichi tuh thil baihlam ahi kei hi. Khovel paidan leh mihing ten i ngaihsante leh i ngaihthupite toh kilehbulh a bang hi. Huaiziak tak in khristiante khat leh khat kihanthawn gige poimoh hi. I unaute lak a khut hatloute leh khutzawte hatsak ding a kipanpihtuah a poimoh hi (Is.35:3).
Khovel i khualzinna ah lunglel in gim kisa kei ni. “Lampi, Thutak leh Hinna” Jesu en in kalsuan zel ni (Jn.14:6). I ma a kipahman en pang teitei ni!
“Huan TOUPA tatte a kik nawn ding ua, lasa khawm in Zion a tung ding uh, khantawn a kipahna a lu tung uah a omta ding a; nuamsakna leh kipahna leh thumna a mangta ding hi” (Is.35:10).
Pa aw, na thutak in hon hihsiangthou in! Siangthouna Lampi ka totna uah hatna, hangsanna leh ka paizohna ding ua poimohte hon pia in!
Unaute zingpha. Tuni hun zatnuam chiat.