Laisiangthou a genkholhna omte toh khovel thiltung zelte mekmat a Rapture hong tung ding ahita chia dipkuathuai tak a gen ahihchiang in mite lungsim zoubaih mahmah hi. Hun paisa ah Rapture hong tung ding hita chia genkholhna omte khat lel leng adik om kei mahleh tuni tan in Rapture kichi thumal in mihingte lungsim zou mahmah lai hi. I gam ah Pathian thu lunglutna leh deihna om lua bang napi in Laisiangthou sim a suut peih taktak, thutak zong mi tawm mahmah hi. Huaiziakin khristian kichi tampi ten Rapture ichih Laisiangthou a om ding dan mah a ngaihtuah in lunglut pen in nei uhi.
Rapture toh kisai gendan kibang lou zekzek om mahleh avek un Antichrist, Kumsagih Gimthuakna, Armageddon Kidouna leh Kumsang Lalgam chihte toh zomkhawm vek chiat uhi.
Laisiangthou ah a om kei
Mi tampite ten Rapture kichi thumal Laisiangthou a om ding in gingta mahle uh khat vei leng kimulou hi. Rapture ichih Latin thumal “Rapio” apan hong kilakhia ahia, “laksak, suhsak” (to snatch or seize) chihna ahi. Jesu hong painawn chiang a misiangthou sisa leh damlaite aguk (secret) a lakmangna, huihkhua a Toupa tuak dia laktouhna genna dan in hon zang uhi. Hiai Rapture sinsakna pen kumzabi khatna hun a nungzuite damlai apan hong piangkhia ahi kei a, denomination tuamtuam hong piangkhiat kumzabi 16 nung lam pek a hong piangkhe pan ahi hi. 1970 kum a Hal Lindsey laibu “The Late, Great Planet Earth” suahkhiak ahih apat hong kigen minthang biik hi. 1 Thess.4:17 ah “laktouh” (Greek – harpazo) chih thumal om mahleh tulai a pawl tuamtuam ten Rapture a zatdan utoh kibanglou hi.
1 Thessalonika 4:16-17 in a sinsak kei
Rapture kichi thumal Laisiangthou ah muh hikei mahleh 1 Thess.4:16-17 in saptuamte aguk (secret) a laktouhna gen hi a gindan aneih ziak un Rapture sinsakna gingta peuhmah in hiai tang pansan pipen in nei vek ding uhi. 1 Thess. 4:17 in misiangthou hong thounawn leh damlaite “laktouh” (Greek – harpazo) a om ding chih gen mah hi. Himahleh Rapture sinsakna bang in thawmneilou (silent) leh aguk (secret) a laktouh ding genlou a, van akipan Toupa mahmah “kikou aw toh, angel tungnungpen aw toh, Pathian pengkul ging toh” (1 Thess.4:16) hong pai ding chi zaw hi. Huaiziakin 1 Thess.4:16-17 in Rapture sinsakna gen khalou hi.
Rapture toh kisai mah a genna uah 1 Thess.4:16 in “…Khrist a sisate athou masa phot ding ua” achih ziak in Rapture hun chiang in midiktat sisate thounawn ding ua, himahleh mikhialte bel anung Kumsang Lagam zoh chiang in thounawn pan ding chi uhi. Himahleh hiai tang in midiktat leh mikhialte thohnawnna ding thu gen hilou hi. A damlai ten Khrist a sisate makhelh ding dan a ngaihtuahna nei a om ziak un Paul in makhelh lou ding ahihdan uh a genna hizaw hi (4:15). Huaiziakin Paul in “…Khrist a sisate a thou masa phot ding ua; Huai khit chiang in eite hingdam a na omlaite, huihkhua ah Toupa tuak ding in amau (Khrist a sisate) toh mei lak ah laktouh in I om ding ua; huchi’n tangtawn in Toupa kiang ah I omta ding hi” (4:16-17) chi hi.
Rapture leh Laisiangthou sinakna a kituak kei
Rapture leh Laisiangthou sinsakna kituaklou tampi om mahleh I en vek zou kei ding a, anuai ah tamlou I en ding.
Jesu aguk (secret) a hong pai ding ahi achi ua, himahleh Laisiangthou in aguk a hong pai ding achi kei. Rapture chiang in Jesu aguk (secret) in hong pai ding a, misiangthoute hong latou ding chi uhi. Himahleh Laisiangthou in Jesu mi tengteng muh theih a hong pai ding ahihdan a gen hi: “Hiai Jesu…van a paitou na muh mah bang un amah mah ahong kiknawn ding” (Nas.1:11), “…Mit teng in Amah a mu dia, Amah a nak a sunpa nangawn in amu ding” (Kil.1:7) chi hi. Van a paitou muh theih ahih bang in ahong painawn chiang in leng mi tengteng muhtheih ding in hong pai ding hi.
Jesu thawmneilou (silent) a hong pai ding ahisak ua, himahleh Laisiangthou in ging ngaihtak toh hong pai ding achi. Thawmneilou a Jesu hong pai a misiangthoute aguk a laktouh a om ding chih gindan aneih ziak un khristian kichi tampi ten nutsiat khak a om ding alau mahmah uhi. Himahleh Laisiangthou in thawmneilou (silent) leh aguk (secret) a hong pai ding in genlou a, “Toupa mahmah kikou aw toh, angel tungnungpen aw toh, Pathian pengkul ging toh, van a kipan a hong paisuk ding” (1 Thess.4:16) chi zaw hi. Rapture gingta ten a pansan mun mahmah uh 1 Kor.15:50-55 in leng mitphiatkal sung a hihlamdan a I om hun ding “pengkul nanungpen” hong ging chiang in (1 Kor.15:52) chi zaw hi. Peter in “…huai ni chiang in van khawng nakpitak a ging in...” (2 Pet.3:10) achi hi. Huaiziakin Laisiangthou in ging ngaihtak toh Jesu hong painawn ding ahihdan hon sinsak zaw hi.
Mi diktatte leh diktatloute thohnawnna tuam om ding achia ua, himahleh Laisiangthou in thohnawnna khat ah thounawn ding uh achi. Rapture sinsakna dungzui in thohnawnna nihvei val om hi. Rapture chiang in midiktatte thounawn ding in gen ua, himahleh mikhialte bel anung Kumsang Lalgam zoh chiang a thounawn pan ding in gen uhi. Himahleh Jesun midik leh mikhialte thohnawnna khat a thounawn ding uh ahihdan a gen hi: “…hankhuk sung a omte tengteng in a aw azak hun uh a hong tung ding, huchiin ahong pawtkhe ding ua, thilhoih hihte hinna tang in a thounawn ding ua, thilhoihlou hihte bel, siamlouh tang in a thounawn ding uh” (Jn.5:28-29). Sawltak Paul in leng “mi diktatte leh diktatloute thohnawnna khat a om ding” (Nas.24:15) chi hi. Eipau ah khat kichi thumal om khalou a, himahleh Sappau ah “…there will be a resurrection of the death, both of the just and the unjust” (NKJV) chi hi. “A resurrection” ichih eipau in thohnawnna khat chihna ahi. Hiai mah tuh a Greek thumal toh leng kituak hi.
Jesu hong paina thumvei lam a omsak ua, himahleh Laisiangthou in nihvei agen. Jesu leitung ah khat vei hong paita a, maban ah Rapture chiang in gingtute la ding in hong painawn ding a, huchiin leitung ah kum sagih gimthuakna kipan ding a, gimthuakna khit chiang in Kumsang Lalgam phutkhe ding in hong painawn ding chi uhi. Huaiziakin Jesu hong paina thumvei lam a om sak uhi. Rapture pen Jesu hong painawnna “Second Coming” (Kumsang Lalgam phutkhe dia hong pai ding achih uh) toh kibanglou ahi chihna ding in Jesu hong painawnna ding a kizang Greek thumal nih “parousia” (1 Thess.4:15) leh “epiphania” (1 Tim.6:14) a uang gen mahmah uhi. Himahleh Paul in hiai thumal tegel Jesu hong painawnna ding hun khat genna in a zangkhawm hi: “…Toupa Jesu’n amah tuh a kam hatna in a hihlum dia, ahong paina (parousia) leh kilakna (epiphania) in a hihmang ding” (2 Thess.2:8) achi hi. Laisiangthou in Jesu khatvei hong paikhinta ahihdan leh a nihveina dia hong painawn ding ahihdan agen: “Khrist tuh mi tampite khelhnate pomang ding in khatvei latkhiak in a omta hi. A nihveina ding in, khelhna toh kisai kha nawnlou in, ngaklah tak a amah na ngakte hondam ding in ahong lang nawn ding hi” (Heb.9:28). A nihveina hong paina ah a lalgam phutkhe ding hilou in Pa kiang ah pekhe ding a, hun beina hi ding hi (1 Kor.15:23-24; 2 Pet.3:7-10).
Aguk a Jesu hong painawnna Rapture omlou ding ahihmanin theih khaklouh ding lau kenla; thei ngeingei ding na hihna ah siamlouhtang a na om ding lauzaw in (Matt.25:31-33, 46; 24:40-41; Jn.12:48). A hong pai hun ding Pa kia lou ngal in a thei kei (Matt.24:36), hun teng a hong pai thei gige ahihna ah kiging gige in om ni (Matt.24:44). A hong painawn chiang a hotdam na hih theihna ding in Jesu Khrist gingta in (Jn.3:16; Mk.16:16; Heb.11:6), Kisik inla (Nas.3:19; 17:30), Jesu Khrist Pathian tapa ahi chih kam ngei a puang in Gum in (Rom.10:9-10; Nas.8:36), na khelhnate ngaihdamna ding in Baptisma tang inla (Mk.16:16; Nas.2:38; 22:16; 1 Pet.3:21), huchiin sih tanpha in Ginom in (Kil.2:19). +++
Note: Hiai article Covid-19 first wave lockdown om sung April 07, 2020 a ka gelhkhiak masak ahia, saptuam bulletin, WhatsApp group leh mun tuamtuam ah leng ana kikoihkhe ngeita hi