Huan Nun tapa Josua in, A gam leh Jeriko khuate va en vel vel dih ua, chi’n mi nih Sitim mun a kipan in a sim a enkhe ding a sawl hi. Huan, a va hoh ua, kizuak khat, a min Rahab inn ah a valut ua, huai ah a tung uh (Jos.2:1).
Kizuak tamzaw in mahni kingaihsanna a nei tawm mahmah uhi. Rahab leng a dinmun kingaisang ding in gintakhuai hetlou hi. Gam enkhete a inn a hong lut ma ua a dinmun i thei kei hi. Bangziak a kizuak kha ahia, tagah a genthei tak a hinkhua a zat khak ziak a diam, a pasal in a sihsan hiam a inkuan ten a taihsan ziak uh ahi diam ahihkeileh midang in utlou pipi a kizuak dia a pilut khak uh adiam chihte bangmah i thei kei hi. Neu akipan kuamah kizuak a nekzon ut om ding in gintakhuai lou hi. Kizuak tamtak ten dinmun haksa tak leh hehpihhuai theihna ding dinmun gen ding hau mahmah uhi.
Himahleh Pathian a ginna ziak in Laisiangthou ah numei minthang tak hong suak hi. Mun tamzaw ah “Rahah, kizuaknu” chi a theih in om mahleh numei thupite lak a simtel ahi. Hebrew 11 ah ginna a mi minthangte lak ah Abraham, Mosi leh a dangdangte toh genkhawm khak in om a (Heb.11:31), Jakob 2 ah ginna ziak kia hilou a, thilhih ziak a siamtang ihi chih etsakna ding in Abraham toh genkhak in om hi (Jak.2:25). Huai kia hilou in Matthai 1 ah Jesu Khrist khanggui ah leng gentel khak in a om hi.
I phattuam louhnate leng Pathian in hon lakkhiak sak a athupina dia hon zang thei gige ahi chih imu thei hi. Hamphat huai na tel e maw!
Unaute zingpha. Tuni hun zatnuam chiat