“Na ankuangluite uh ka hua in ka musit a, na kikhawmpi pisuakte uah leng ka kipak sam kei hi. Ahi, na thillat uleh na buhlat uh honlan mahle uchin, ka sang kei ding a, na gan thau uh lemna thillatte leng ka limsak kei ding hi. Na kaihging ging kilawm uh ka ngaikhe kei ding; huaiziak in kei a kipan bil aphuai na late uh lamang un. Himahleh vaihawmna dik bel tuite bang in leh diktatna lui lian bang in luang hen” Toupa’n a chi (Amos 5:21-24).
Hun khenkhat ah i kikhopna a lasakte, thugente, thumna neihte ninhuai khop a anop louh hun om thei mawk hi. Midang visitor bang a om khak chiang in bang hon chi muh duh aw, a hong kikhawm ut nawn duh aw chihte i ngaihtuahna bang ah om thei hi.
Mihing lam a i etdan pen thutuam hileh, Pathian in i biakna uh bang chi’n a mu dia chihte i ngaihtuahna ah a om ngei hiam? Lapitute, thumna makaite, thugentute Pathian in bang a chi muh dia chih kia hilou in, ken Pathian ka biakna bang hon chi ngaihtuah dia chihte ki-et zelzel poimoh hi.
Bang chidan a i biakna in Pathian kipak sak ahi dia? Lasak ka siam ziak ahi diam? Ahihkeileh thugen ka siam ziak? Ahihkeileh nalh tak a ka kicheina in?
Hiaite tengteng Pathian adia a poimoh masa pen hilou ding hi. Thumna ka neih ma, phatna la ka sak ma, tanghou leh grape tui ne a ka dawn ma, thu ka gen ma a Pathian in amah ka biakna pomtak ahih ding leh ding louh ana thei khin ahi diam chihte ngaihtuah tham hi.
Vaihawmna dik (justice) leh diktatnate (righteousness) i niteng hinkhua ah poimoh a, huaite a om louh chiang in i biaknate Pathian a ding in pomtaak lou suak thei hi.
Pa aw, nang adia pomtaak biakna kon piak theihna ding un ka hinkhua uh na deih dan a khosa thei ding in hon panpih in.
Unaute zingpha. Tuni hun zatnuam chiat.