Phak, hii vei zaw a puante bohkek ahi ding a, a samte a khah ding a, a muk tunglam a tuam ding a, sianglou, sianglou, chi in a kikou ding ahi. Phak in a bop sung teng a nin ahi ding a; a nin ahi a, a om tuam ding ahi; a omna ding dainawl ahi (Lev.13:45,46)
Phak natna tuh sihna sang a leng vangsiathuai zaw khop a deihhuai lou natna ahi. Phak natna neite a chipihte, lawmte leh inkuante toh khen in om ua, kho polam dainawl ah khumtuam hi uhi. A sianglou a ngaih ahi ua, natna lauhuai ahihziak in amau bang a phak natna neite kia toh omkhawm thei uhi. Hiai in taksa leh lungsim natna, thawmhauna hon tun hi.
Phakna natna leh khelhna kibatna khenkhat:
- Khelhna in leng taksa leh lungsim natna hon tun a, hon it-tute leng nasak ban hi (Pau. 4:19; 13:15)
- Khelhna a lauhuai a, phak natna bang in i hinkhua hon laksak in sihna hon tun hi (Rom. 6:23; Eph. 2:1)
- Khelhna in hon ninsak a, i hinkhua hon buahsak a kihhuaipi hon suaksak hi (Pau. 6:16-19; Kil. 22:11)
- Khelhna in hon thawmhau sak a, midangte apan hon khen in i khelhna kia toh hon khosa sak hi (Gal 5:19-21).
Himahleh Jesu tuh mikhialte lawng a hihdam ding in hong pai hi. I natnate hon lakkhiak sak in i pumpi sithei tuh hinna hon pia hi (Rom.8:11). A hon siangsak a, a inkuante toh hon zom nawn in midangte adia hing ding in hon sinsak hi (Rom.12:9-21).
Unaute zingpha. Tuni hun zatnuam chiat.