Ka bawkin leng a kiang uah a om dinga, a Pathian uh ka hi dinga, amau ka mite ahi ding uh. Huan a lak ua khantawn a dinga ka biakbuk a din hun chiangin kei TOUPA, Israel hihsiangthoupa ka hi chih namten a thei ding uh, chi in, chiin (Ezek.37:27).
Bangziak a namdangte lak a Pathian min sukbuah a om ahia? Pathian’ mite’n a thil gilou hihte uh ziak a Pathian zahna a neihlouh ziak uh ahi (Ezek.36:16-21). Namdangte’n Pathian a mu thei kei ua, himahleh akiim ua Pathian’ mi omte bel a mu thei uhi. Huaiziak in a mite tuh Pathian’ min thupi langsaktute ahi uhi. Hinapi in a thil gilou hihte uh ziak in a min bangmah lou a suah uhi.
Ahihleh Pathian in a min thupina bang chi’n a phoulak thei dia? A mite lak ah mun siangthou omsak nawn a ateen kik a poimoh hi. A mite lak a ateenkik theihna ding in hiai a gen hi ” …ka thupiakte a mang ding ua, ka dan bawlte a zui ding ua, a zang ding uh” (37:24).
Khristiante’n leng i thilhih leh nasep in Pathian zahna a langsak na hia ahihkeileh min sesak zaw chihte mimal chiat ah kidot gige poimoh hi. I lungtang a ateen theihna ding in Pathian in mun a nei hia chih mimal chiat ah kidong lehang ichi hi.
Pa aw, ka hinkhua ua na mel a lat theihna ding in ka lungsim uleh ka salam buahnate tengteng uh hon siangsak in. Ka hinkhua uah na min thupisak in om hen!
Unaute zingpha. Tuni hun zatnuam chiat.