Huai ni chiang in a kho kiptakte uh gammang leh tangvum a mun taisan sa, Israel ma a ataisan sa bang uh, ahi ding; huchi’n mun loih ahita ding hi. Nang hon hondampa Pathian na mangngilh a, na hatna Suangpi lah na theigige ngal kei a; huaiziak in kung kilawm taktakte na suan sek a, asung ah hiang tuamte na vut tang niaunuau sek a (Is.17:9,10).
Khovel ah sum leh pai, neih leh lam, leh gou thupi taktak nei a, ahihhang a Pathian lam a haulou tampi om hi. Pathian in huai vualzawlnate nei kawmkawm a Amah leng nei a, Amah lam a hausa ding in mimal hi in saptuam hitaleh a hon deih hi.
Himahleh i nasep leh thilbawlte Pathian lam a hauhna ding hilou a, mahni adi kia a punna leh metna ahihleh Isai laibu a i muh tanglai a lalgam tuamtuam Babylon (ch 13), Assyria (ch 14), Moab (ch 15-16), Syria (ch 17) leh Israel (ch 17) chihte mah kibang kha thei hi. I nasep leh thilbawlte ziak in suksiat a om in, thukhen khum in i om ding hi.
Pa aw, khovel thilte sang a Nang mah lam a hau masa ding in hon panpih inla, nasep hoih leh midangte panpihna leh thilpiak a hausa ding in ka lungsim uh hon vualzawl in.
Unaute zingpha. Tuni hun zatnuam chiat.