Huchia Mosi in biakbuk a lamkhiat a, thau a nilhkhit a, a hihsiangthou khit in… Israel-te intekpen, a innkuan ua inntekpen te’n thillat a lan ua, … TOUPA ma ah a hon tawi ua, biakbuk bul ah a hong lan uhi (Nam.7:1-3)
Nambars 7 tuh Danbute (Bible bu masa 5-te) lak a bung saupen, a tang (verse) a sim dia Laisiangthou pumpi a saupen nihna ahi.
Mosi in biakbuk a lamkhit a, kisimna bung khat a hon neihma hun akipan hon pan in bung 2 a kigensa Israel nam 12 heutu ten biakbuk a thillat hon lat thu uh hon gen hi. Namchih heutu ten thilpiak bawl chiat ahihman un ni 12 sung lut hi.
Hiai Nambars 7 akipan i ziltheih bangzah hiam om hi:
Pathian kiang a hon van tawite uh ganhing, tangbuang, dangkasik kuang leh a dangdangte a thillatna ding uleh a biakna dung un poimoh vek hi. Hiai akipan in i niteng nasep leh thilbawlte teng leng biakna chi khat ahi chih muhtheih hi. Lasakna, thumna, Bible study chihte kia biakna dan a ngaihtuahlou in, i niteng mohpuakna, sep leh bawlte leng biakna chi khat, Pathian’ nasepna ahi chih ngaihtuah thak ni (Eph.6:5-8; Kol.3:22-25).
Thilpiak kibang ngen kitawi teng Pathian in ana theihpih vek ahihdan muhtheih hi. Niteng in heutu teng in thilpiak leh thillat kibang hon tawi vek uh chi’n Mosi in ana gelh leh a bung tom tuan mahmah ding hi. Himahleh huchiin ana gelh kei a, niteng in a thillat uh kibang mahleh hon gelh tuantuan hi. I sim chiang in a thu kibang leh thillat kibang ngen ahihman in ninghuai sim bang mahle Pathian a ding in ninghuai lou hi. A nikhatni a thillat a pompih a alunglut bang in ani 12-ni’n leng lunglut in pompih hi. Tuni’n khristian-te kiang ah leng Pathian in hiai ana gen hi: “Nna nasep uh leh a min ziak a itna na latsak uh, mi siangthoute nna nasepsak uh, tutan a leng na seplai uh, mangngilh di’n Pathian mitaklou ahi ngal kei ahi” (Heb.6:10).
Unaute zingpha. Tuni hun zatnuam chiat