Huan, Pathian in Solomon pilna leh theihna thupi mahmah leh lungsim letna tuipi piau a piaunel bang mai a pia hi (1 Kum.4:29)
Solomon pil mahmah hinapi in dotna khat a dawn theihlouh om hi. Huai dotna tuh Eklijiasti laibu ah ana dong hi: Mihing in ni nuai a sepgimna tengteng asepgim akipan bang phattuamna anei a? (1:3;2:22).
Hiai dotna tuh dotna poimoh tak ahi. Mi pil pen Solomon in dawn ana sawm hi. Ni nuai (under the Sun) ah mihingte hinsan pipen (main purpose) zon theih teng ana zong a, thil phatuam tamtak mumah leh huaite bangmah lou ahidan leh mihingte hinsan pipen ahihlouh dan ana musuah in, hiai ana gen hi:
Bangmahloute bangmahlou, bangmahloute bangmahlou, bangteng bangmahlouh ahi, Thugenpa’n a chi (1:2; 12:8).
Atawp in ni tung lam (above the Sun) ah mihingte hinkhua thil tup leh hinsan (meaning amd purpose of life) hon zong a, hiai hon musuah in hon gen hi:
Hiai thu lel a tawpna ahi; a vek in zak in a omta: Pathian laudan siam inla, a thupiakte zui in; hiai lah mihing hihding pumpi ahi ngal a. Pathian in lah thilhih chiteng vaihawmna a la lut ding ahi ngal a, thil selguk chiteng, a hoih hia a hihkeileh a hoihlou toh (12:13-14).
Solomon in athu (theory) a ana gen tuh dik ahihna Jesu’n atak in hon lak hi. Jesu’ sihna in i hinkhua a ding in nisa tung lam ah (above the sun) lametna hon pia hi. I hinsante tuh bangmah lou thilte hi nawnlou in, i sepgim man, i thaman om a hong hitheita hi. Huaiziak in Sawltak Paul in hiai na gen hi:
Ka unau deihtakte aw, kiptak in, hihlin vuallouh in, Toupa nasep phatuamngai tak a sem gige in om un, na sepgimna uh Toupa ah a thawn ngei kei chih na thei ngal uhi (1 Kor.15:58).
Pa aw, na tapa Jesu hong sih a, hong thohnawnna ziak in tangtawn hin theihna lametna nei thei ka hih ziak un ka kipak uhi. A thawn a semgin hi nawnlou ka hihman un ka kipak ua, phatuam ngaitak a nang adia semgim thei ding in hon panpih in.
Unaute Toupa’ ni zingpha. Tuni kikhop nuam chiat